എഥനോൾ ഉൽപ്പാദനത്തിന് ചോളം ഉപയോഗിക്കുന്നത് മറ്റു മേഖലകളെ ബാധിക്കില്ലെന്ന് ഡിസ്റ്റിലേഴ്സ് അസോസിയേഷൻ

ജ്യത്ത് എഥനോൾ ഉൽപ്പാദനത്തിനായി ചോളം കൂടുതലായി ഉപയോഗിക്കുന്നത് മറ്റ് വ്യവസായങ്ങളെ ഒരു തരത്തിലും ബാധിക്കില്ലെന്ന് ഓൾ ഇന്ത്യ ഡിസ്റ്റിലേഴ്‌സ് അസോസിയേഷൻ (AIDA) വ്യക്തമാക്കി. കോഴിത്തീറ്റ അടക്കമുള്ള മറ്റു ആവശ്യങ്ങൾക്കായി ചോളം ഉപയോഗിക്കുന്ന മേഖലകളുമായി എഥനോൾ വ്യവസായം മത്സരിക്കുന്നില്ലെന്നും, മറിച്ച് ഇന്ത്യൻ കാർഷിക വിഭവങ്ങളിൽ നിന്ന് കൂടുതൽ മൂല്യവർദ്ധിത ഉൽപ്പന്നങ്ങൾ സൃഷ്ടിക്കുകയാണ് ചെയ്യുന്നതെന്നും അസോസിയേഷൻ ഡെപ്യൂട്ടി ഡയറക്ടർ ജനറൽ ഭാരതി ബാലാജി പറഞ്ഞു. രാജ്യത്തെ ഊർജ്ജ സുരക്ഷ ഉറപ്പാക്കുന്നതിനൊപ്പം ഗ്രാമീണ സമ്പദ്‌വ്യവസ്ഥയെ ശക്തിപ്പെടുത്താനും കർഷകർക്ക് മികച്ച വരുമാനം നൽകാനും ലക്ഷ്യമിട്ടാണ് ഈ മാറ്റമെന്നും അവർ കൂട്ടിച്ചേർത്തു.

നിലവിൽ രാജ്യത്തെ എഥനോൾ ഉൽപ്പാദനത്തിനുള്ള ഏറ്റവും പ്രധാനപ്പെട്ട അസംസ്കൃത വസ്തുവായി ചോളം മാറിയിരിക്കുകയാണ്. മുൻകാലങ്ങളിൽ കരിമ്പിനെയായിരുന്നു കൂടുതലായി ആശ്രയിച്ചിരുന്നതെങ്കിൽ, ഇപ്പോൾ രാജ്യത്തെ എഥനോൾ വിതരണത്തിൽ പകുതിയോളവും (48 ശതമാനം) ചോളത്തിൽ നിന്നാണ് ഉൽപ്പാദിപ്പിക്കുന്നത്. ഈ മാറ്റം മൂലം കാലാവസ്ഥയെ ആശ്രയിക്കാതെ വർഷം മുഴുവനും തടസ്സങ്ങളില്ലാതെ എഥനോൾ ഉൽപ്പാദിപ്പിക്കാൻ സാധിക്കുന്നുണ്ട്. ഇതിനുപുറമെ, ചോളം കർഷകർക്ക് കൃത്യമായ താങ്ങുവില ഉറപ്പാക്കാനും ഗ്രാമീണ കാർഷിക മേഖലയ്ക്ക് പുതിയൊരു ഉണർവ്വ് നൽകാനും ഇത് സഹായിക്കുന്നു. പെട്രോളിൽ എഥനോൾ കലർത്തുന്നതിലൂടെ ക്രൂഡ് ഓയിൽ ഇറക്കുമതി കുറച്ച് വിദേശനാണ്യം വലിയ തോതിൽ ലാഭിക്കാനാകുമെന്നും, കാർബൺ പുറന്തള്ളൽ കുറച്ച് പരിസ്ഥിതി സൗഹൃദമായ ഊർജ്ജലഭ്യത ഉറപ്പുവരുത്താനാകുമെന്നും അസോസിയേഷൻ ചൂണ്ടിക്കാട്ടുന്നു.