കുരുമുളക് വള്ളികൾ സമൃദ്ധമായി പുഷ്പിക്കാനും തിരികളിൽ മണികൾ തിങ്ങിനിറയാനും

കുരുമുളക് വള്ളികൾ സമൃദ്ധമായി പുഷ്പിക്കാനും തിരികളിൽ മണികൾ തിങ്ങിനിറയാനും കൃത്യമായ പരിചരണവും സമയബന്ധിതമായ വളപ്രയോഗവും അനിവാര്യമാണ്. കാലവർഷത്തിന്റെ തുടക്കത്തിൽ ലഭിക്കുന്ന ആദ്യ മഴയാണ് കുരുമുളകിന്റെ പൂവിടലിനെ സ്വാധീനിക്കുന്ന പ്രധാന ഘടകം. ഇതിനു പുറമെ, വേനൽ കഠിനമാകുമ്പോൾ വള്ളികൾക്ക് മുകളിൽ നിന്ന് ഇലകളിൽ കൂടി നനയ്ക്കുന്നത് പരാഗണം സുഗമമാക്കാൻ സഹായിക്കും. കുരുമുളകിൽ പരാഗണം നടക്കുന്നത് വെള്ളത്തിലൂടെയായതിനാൽ, ഇലകളിലൂടെ ഒലിച്ചിറങ്ങുന്ന വെള്ളം പൂമ്പൊടികളെ പെൺപൂക്കളിലെത്തിച്ച് തിരികളിൽ മണികൾ നന്നായി പിടിക്കാൻ സഹായിക്കുന്നു.

​മണ്ണിന്റെ അമ്ലഗുണം നിയന്ത്രിക്കുകയാണ് വളപ്രയോഗത്തിലെ ആദ്യ ഘട്ടം. മെയ് മാസത്തിൽ മഴ തുടങ്ങുന്നതിന് മുൻപായി ഓരോ ചുവട്ടിലും 500 ഗ്രാം കുമ്മായമോ ഡോളോമൈറ്റോ ചേർത്ത് മണ്ണുമായി നന്നായി ഇളക്കി യോജിപ്പിക്കണം. ഇത് ചെടിക്ക് പോഷകങ്ങൾ ആഗിരണം ചെയ്യാനുള്ള ശേഷി വർദ്ധിപ്പിക്കുന്നു. തുടർന്ന് ജൂൺ മാസത്തിൽ ആദ്യ മഴയോടെ 10 കിലോ ഉണങ്ങിപ്പൊടിഞ്ഞ കാലിവളം അല്ലെങ്കിൽ കമ്പോസ്റ്റ് നൽകണം. ഇതിനോടൊപ്പം ഒരു കിലോ വേപ്പിൻപിണ്ണാക്കും ചേർക്കുന്നത് വേരുകളെ സംരക്ഷിക്കാനും വള്ളികളുടെ ആരോഗ്യത്തിനും ഉത്തമമാണ്.
​രാസവളങ്ങൾ ഉപയോഗിക്കുന്നവർ കൃത്യമായ അളവ് പാലിക്കാൻ ശ്രദ്ധിക്കണം. ഒരു വിളഞ്ഞ വള്ളിയ്ക്ക് ഒരു വർഷം 100 ഗ്രാം നൈട്രജൻ (220 ഗ്രാം യൂറിയ), 40 ഗ്രാം ഫോസ്ഫറസ് (200 ഗ്രാം രാജ്ഫോസ്), 140 ഗ്രാം പൊട്ടാഷ് (230 ഗ്രാം മ്യൂറിയേറ്റ് ഓഫ് പൊട്ടാഷ്) എന്നിവയാണ് ശുപാർശ ചെയ്തിട്ടുള്ള അളവ്. ഇത് രണ്ട് തുല്യ ഗഡുക്കളായി (മെയ്-ജൂൺ മാസങ്ങളിലും സെപ്റ്റംബർ-ഒക്ടോബർ മാസങ്ങളിലും) നൽകണം. കൂടാതെ, ചുവടൊന്നിന് 50 ഗ്രാം മഗ്നീഷ്യം സൾഫേറ്റ് നൽകുന്നത് ഇലകൾ മഞ്ഞളിക്കുന്നത് തടയാനും പ്രകാശസംശ്ലേഷണം കൂട്ടാനും സഹായിക്കും.
​തിരികൾ കൊഴിയാതെ മണികൾ നന്നായി പിടിക്കാൻ സൂക്ഷ്മ മൂലകങ്ങളുടെ പ്രയോഗം അത്യാവശ്യമാണ്. കുരുമുളക് തിരി വിരിയുന്ന സമയത്ത് (ജൂലൈ-ഓഗസ്റ്റ്) 'ഐ.ഐ.എസ്.ആർ കുരുമുളക് സ്പെഷ്യൽ' (IISR Pepper Special) എന്ന സൂക്ഷ്മ മൂലക മിശ്രിതം ഒരു ലിറ്റർ വെള്ളത്തിൽ 5 ഗ്രാം എന്ന തോതിൽ കലക്കി ഇലകളിൽ തളിച്ചു കൊടുക്കുന്നത് തിരി കൊഴിച്ചിൽ കുറയ്ക്കാനും മണികൾക്ക് തൂക്കം വർദ്ധിക്കാനും സഹായിക്കും. ജൈവ രീതിയിലാണ് കൃഷി ചെയ്യുന്നതെങ്കിൽ 10 ലിറ്റർ വെള്ളത്തിൽ 1 ലിറ്റർ എന്ന തോതിൽ പുളിപ്പിച്ച പിണ്ണാക്ക്-ചാണക സ്ലറി നേർപ്പിച്ചു ഒഴിച്ചു കൊടുക്കാവുന്നതാണ്.

​രോഗ-കീട നിയന്ത്രണമാണ് വിളവ് സംരക്ഷിക്കാൻ ഏറ്റവും പ്രധാനം. മഴക്കാലത്ത് കണ്ടുവരുന്ന ദ്രുതവാട്ടം തടയാൻ ചുവട്ടിൽ 1% വീര്യമുള്ള ബോർഡോ മിശ്രിതം ഒഴിച്ചു കൊടുക്കുകയും വള്ളികളിൽ തളിക്കുകയും വേണം. പൊള്ളുവണ്ടിന്റെ ആക്രമണം നിയന്ത്രിക്കാൻ 0.1% വീര്യമുള്ള ക്വിനാൽഫോസ് (ഒരു ലിറ്റർ വെള്ളത്തിൽ 2 മില്ലി) മണികൾ പിടിക്കുന്ന സമയത്ത് തളിക്കാവുന്നതാണ്. ജൈവ മാർഗ്ഗമാണെങ്കിൽ വേപ്പെണ്ണ-വെളുത്തുള്ളി മിശ്രിതം ഉപയോഗിക്കാം. ഇത്തരം ശാസ്ത്രീയമായ രീതികൾ പിന്തുടരുന്നതിലൂടെ കുരുമുളക് കൃഷിയിൽ നിന്നും മികച്ച ആദായം ഉറപ്പാക്കാൻ സാധിക്കും.