ട്രാക്ടർ വിൽപ്പനയിൽ വൻ നേട്ടവുമായി മഹിന്ദ്ര; 2026 മാർച്ചിൽ 33 ശതമാനം വളർച്ച

ന്യൂഡൽഹി: മഹീന്ദ്ര ഗ്രൂപ്പിന്റെ ഭാഗമായ മഹീന്ദ്ര ആൻഡ് മഹീന്ദ്ര ലിമിറ്റഡിന്റെ ഫാം എക്യുപ്‌മെന്റ് ബിസിനസ് (FEB) 2026 മാർച്ചിലെ ട്രാക്ടർ വിൽപ്പന കണക്കുകൾ പുറത്തുവിട്ടു. കഴിഞ്ഞ വർഷത്തെ അപേക്ഷിച്ച് ആഭ്യന്തര വിപണിയിൽ 33 ശതമാനത്തിന്റെ മികച്ച വളർച്ചയാണ് കമ്പനി കൈവരിച്ചിരിക്കുന്നത്.

2026 മാർച്ചിൽ 43,403 ട്രാക്ടറുകളാണ് കമ്പനി ആഭ്യന്തര വിപണിയിൽ വിറ്റഴിച്ചത്. 2025 മാർച്ചിൽ ഇത് 32,582 യൂണിറ്റുകളായിരുന്നു. ആഭ്യന്തര വിൽപ്പനയും കയറ്റുമതിയും ഉൾപ്പെടെയുള്ള ആകെ ട്രാക്ടർ വിൽപ്പന 45,035 യൂണിറ്റിലെത്തി. കഴിഞ്ഞ വർഷം ഇതേ കാലയളവിൽ ഇത് 34,934 യൂണിറ്റുകൾ മാത്രമായിരുന്നു. 29 ശതമാനത്തിന്റെ ആകെ വളർച്ചയാണ് ഇതിലൂടെ രേഖപ്പെടുത്തിയത്. മാർച്ചിൽ മാത്രം 1,632 ട്രാക്ടറുകൾ കമ്പനി കയറ്റുമതി ചെയ്തു.

റെക്കോർഡ് വാർഷിക വിൽപ്പന

2026 സാമ്പത്തിക വർഷത്തിൽ (FY26) കമ്പനി തങ്ങളുടെ ചരിത്രത്തിലെ ഏറ്റവും ഉയർന്ന വാർഷിക ആഭ്യന്തര വിൽപ്പനയാണ് സ്വന്തമാക്കിയത്. മുൻവർഷത്തെ അപേക്ഷിച്ച് 24 ശതമാനം വളർച്ചയോടെ 5,05,930 ട്രാക്ടറുകളാണ് ഈ സാമ്പത്തിക വർഷം ആഭ്യന്തര വിപണിയിൽ മാത്രം വിറ്റഴിച്ചത്. സാമ്പത്തിക വർഷത്തിലെ ആകെ കയറ്റുമതി 17 ശതമാനം വളർച്ചയോടെ 20,473 യൂണിറ്റുകളായും ഉയർന്നു. ആഭ്യന്തര വിപണിയും കയറ്റുമതിയും ചേർത്ത് ആകെ 5,26,403 ട്രാക്ടറുകളാണ് ഈ സാമ്പത്തിക വർഷം മഹിന്ദ്ര വിറ്റഴിച്ചത്.

ഈ മികച്ച നേട്ടത്തെക്കുറിച്ച് മഹീന്ദ്ര ആൻഡ് മഹീന്ദ്ര ലിമിറ്റഡിന്റെ ഫാം എക്യുപ്‌മെന്റ് ബിസിനസ് പ്രസിഡന്റ് വിജയ് നക്ര പ്രതികരിച്ചു:

"കഴിഞ്ഞ വർഷത്തെ അപേക്ഷിച്ച് 33 ശതമാനം വളർച്ചയോടെ മാർച്ചിൽ ആഭ്യന്തര വിപണിയിൽ 43,403 ട്രാക്ടറുകൾ വിൽക്കാൻ സാധിച്ചതിൽ സന്തോഷമുണ്ട്. ഇത്തവണ നവരാത്രി ഉത്സവം പൂർണ്ണമായും മാർച്ച് മാസത്തിൽ വന്നത് ഈ ഉയർന്ന വിൽപ്പനയ്ക്ക് വലിയൊരു കാരണമായി. 24 ശതമാനം വാർഷിക വളർച്ചയോടെ, 5,05,930 യൂണിറ്റുകൾ വിറ്റഴിച്ച് ചരിത്രത്തിലെ ഏറ്റവും ഉയർന്ന വാർഷിക വിൽപ്പനയോടെയാണ് ഞങ്ങൾ 2026 സാമ്പത്തിക വർഷം അവസാനിപ്പിച്ചത്."
ലോകത്തിലെ ഏറ്റവും വലിയ ട്രാക്ടർ നിർമ്മാണ കമ്പനിയായ മഹിന്ദ്ര, കാർഷിക ഉപകരണ മേഖലയിൽ തങ്ങളുടെ മുൻനിര സ്ഥാനം ഈ റെക്കോർഡ് വിൽപ്പനയിലൂടെ ഒരിക്കൽ കൂടി ഉറപ്പിച്ചിരിക്കുകയാണ്.