സാങ്കേതികവിദ്യയിലൂടെ കർഷകരെ ശാക്തീകരിച്ച് ഐടിസി (ITC); മികച്ച വരുമാനവുമായി 31,800-ലധികം സുഗന്ധവ്യഞ്ജന കർഷകർ

അത്യാധുനിക സാങ്കേതികവിദ്യയുടെയും വിപണി സാധ്യതകളുടെയും സഹായത്തോടെ രാജ്യത്തെ സുഗന്ധവ്യഞ്ജന കർഷകരുടെ വരുമാനം വർദ്ധിപ്പിക്കാൻ ലക്ഷ്യമിട്ടുള്ള ബൃഹത്തായ പദ്ധതിയുമായി പ്രമുഖ കമ്പനിയായ ഐടിസി (ITC Limited). കമ്പനിയുടെ സമഗ്രമായ കാർഷിക സൌകര്യങ്ങളിലൂടെയും സാങ്കേതികവിദ്യ അടിസ്ഥാനമാക്കിയുള്ള പ്രോഗ്രാമുകളിലൂടെയും 2.2 ലക്ഷം ഏക്കറിലായി പടർന്നുകിടക്കുന്ന 31,800-ലധികം സുഗന്ധവ്യഞ്ജന കർഷകർക്കാണ് ഇതിനോടകം ഇതിന്റെ പ്രയോജനം ലഭിച്ചിരിക്കുന്നത്.

കർഷകർക്ക് മികച്ച കൃഷി ഉപദേശങ്ങൾ, അത്യാധുനിക സാങ്കേതിക വിദ്യകൾ, അന്താരാഷ്ട്ര വിപണിയിലേക്കുള്ള പ്രവേശനം എന്നിവ ലഭ്യമാക്കാൻ ഐടിസിയുടെ ഈ പദ്ധതിയിലൂടെ സാധിക്കുന്നുണ്ട്. ഇത് കർഷകരുടെ ഉൽപ്പാദനക്ഷമത വർദ്ധിപ്പിക്കാനും സുസ്ഥിരമായ കൃഷിരീതികൾ അവലംബിക്കാനും വിദേശ കയറ്റുമതിയിലൂടെ വരുമാനം വർദ്ധിപ്പിക്കാനും സഹായിച്ചു. കഴിഞ്ഞ പത്ത് വർഷത്തെ കണക്കുകൾ പരിശോധിച്ചാൽ, ഈ പ്രോഗ്രാമിന്റെ ഭാഗമായ കർഷകരുടെ വരുമാനത്തിൽ 42 ശതമാനം വരെ വർദ്ധനവ് ഉണ്ടായതായി പഠനങ്ങൾ വ്യക്തമാക്കുന്നു.

ഏഷ്യയിലെ തന്നെ ഏറ്റവും വലിയ സംസ്കരണ കേന്ദ്രങ്ങളിലൊന്ന്

ആന്ധ്രാപ്രദേശിലെ ഗുണ്ടൂരിൽ 6 ഏക്കറിലായി വ്യാപിച്ചുകിടക്കുന്ന ഐടിസിയുടെ സുഗന്ധവ്യഞ്ജന സംസ്കരണ കേന്ദ്രമാണ് ഈ പദ്ധതിയുടെ പ്രധാന കരുത്ത്. ഏഷ്യയിലെ തന്നെ ഏറ്റവും വലിയ സംസ്കരണ കേന്ദ്രങ്ങളിലൊന്നായ ഇവിടെ പ്രതിവർഷം 20,000 മെട്രിക് ടണ്ണിലധികം ഉൽപ്പന്നങ്ങൾ കൈകാര്യം ചെയ്യാനുള്ള ശേഷിയുണ്ട്. 15-ലധികം വ്യത്യസ്ത സുഗന്ധവ്യഞ്ജനങ്ങൾ ഇവിടെ സംസ്കരിക്കുന്നു. ഓർഗാനിക് ഉൽപ്പന്നങ്ങൾ കൃത്യമായി തരംതിരിക്കാനും പാക്ക് ചെയ്യാനുമുള്ള അത്യാധുനിക സൌകര്യങ്ങളും ബാർകോഡ് അടിസ്ഥാനമാക്കിയുള്ള ട്രാക്കിംഗ് സംവിധാനവും ഇവിടെ ഒരുക്കിയിട്ടുണ്ട്. ഇത് അന്താരാഷ്ട്ര ഭക്ഷ്യസുരക്ഷാ മാനദണ്ഡങ്ങൾ പാലിക്കാൻ സഹായിക്കുന്നു.

ജൈവ സുഗന്ധവ്യഞ്ജന കയറ്റുമതിയിൽ മുന്നിൽ

ഈ പദ്ധതികളുടെ മികച്ച വിജയത്തോടെ ഇന്ത്യയിലെ ജൈവ (Organic) സുഗന്ധവ്യഞ്ജനങ്ങളുടെ ഏറ്റവും വലിയ കയറ്റുമറ്റിക്കാരായി ഐടിസി മാറിക്കഴിഞ്ഞു. സുസ്ഥിരമായ കൃഷിരീതികളായ ഇന്റഗ്രേറ്റഡ് പെസ്റ്റ് മാനേജ്‌മെന്റ് (IPM), ഇന്റഗ്രേറ്റഡ് ക്രോപ്പ് മാനേജ്‌മെന്റ് (ICM), ഓർഗാനിക് ഫാമിംഗ് എന്നിവയിലൂടെ കർഷകരെ സ്വയംപ്രാപ്തരാക്കുകയാണ് ഐടിസി ചെയ്യുന്നത്. കമ്പനിയുടെ സ്വന്തം ഫുഡ്സ് ബ്രാൻഡുകൾക്ക് ആവശ്യമായ ഗുണനിലവാരമുള്ള അസംസ്‌കൃത വസ്തുക്കൾ നേരിട്ട് കർഷകരിൽ നിന്ന് ഉറപ്പാക്കുന്നതോടൊപ്പം, കർഷകർക്ക് മികച്ച ജീവനമാർഗ്ഗവും വിപണിയും ഒരുക്കാൻ ഈ സംരംഭത്തിലൂടെ സാധിക്കുന്നു.