കൃഷിയിടത്തിലേക്കും 'അദൃശ്യ കൈകൾ'; ഇനി മണ്ണിലിറങ്ങും ‘എഐ കർഷകർ’

ഭാരതത്തിന്റെ ഹൃദയം ഗ്രാമങ്ങളിലാണെന്ന് പറയാറുണ്ട്. എന്നാൽ ഇന്ന് ആ ഗ്രാമങ്ങളിലെ കൃഷിയിടങ്ങളിൽ പുതിയൊരു ശബ്ദം കേട്ടുതുടങ്ങിയിരിക്കുന്നു - അത് വെറുമൊരു ട്രാക്‌ടറിന്റെ ശബ്ദമല്ല, മറിച്ച് സ്വയം ചിന്തിക്കാനും പ്രവർത്തിക്കാനും ശേഷിയുള്ള നിർമിത ബുദ്ധിയുടേതാണ്. ഹരിയാനയിലെ കർണാലിൽ വയലിൽ പണിയെടുക്കുന്ന വീർ വിർക് എന്ന കർഷകൻ്റെ ജീവിതംതന്നെ ഇതിനൊരു ഉത്തമ ഉദാഹരണമാണ്. തൻ്റെ ട്രാക്‌ടറുമായി ബന്ധിപ്പിച്ചിരിക്കുന്ന ഐപാഡിൽ ഒന്ന് വിരലമർത്തിയപ്പോൾ ട്രാക്‌ടർ തനിയെ നീങ്ങിത്തുടങ്ങി. മനുഷ്യസഹായമില്ലാതെ, കൃത്യതയോടെ അത് ഉരുളക്കിഴങ്ങ് വിളവെടുപ്പ് നടത്തുകയാണ്. പരമ്പരാഗത കൃഷിരീതികളിൽ നിന്ന് ഇന്ത്യ ഒരു ഡിജിറ്റൽ കുതിച്ചുചാട്ടത്തിന് തയാറെടുക്കുന്നു എന്നതിൻ്റെ ഏറ്റവും പുതിയ അടയാളമാണിത്.

വീർ വിർക് എന്ന കർഷകൻ അഞ്ച് വർഷം മുൻപ് അമേരിക്കയിൽ പഠിക്കുമ്പോഴാണ് എഐ അധിഷ്‌ഠിത കൃഷിരീതികളെക്കുറിച്ച് അറിയുന്നത്. 2021ൽ ഇന്ത്യയിൽ തിരിച്ചെത്തിയ അദ്ദേഹം സ്വീഡനിൽ നിന്ന് ഏകദേശം 3,864 ഡോളർ (ഏകദേശം 3.2 ലക്ഷം രൂപ) ചെലവിൽ ഒരു ഓട്ടമേറ്റഡ് സംവിധാനം ഇറക്കുമതി ചെയ്തു‌. ഒരു സ്‌റ്റിയറിങ് മോട്ടോർ, സാറ്റലൈറ്റ് സിഗ്നലുകൾ, ഡേറ്റ വിശകലനം ചെയ്യുന്ന എഐ സോഫ്റ്റ്വെയർ എന്നിവ അടങ്ങുന്നതായിരുന്നു ഈ സംവിധാനം.

കൃഷിയിടത്തിലെ 'അദൃശ്യമായ കൈകൾ'

വീർ വിർക് എന്ന കർഷകൻ അഞ്ച് വർഷം മുൻപ് അമേരിക്കയിൽ പഠിക്കുമ്പോഴാണ് എഐ അധിഷ്‌ഠിത കൃഷിരീതികളെക്കുറിച്ച് അറിയുന്നത്. 2021ൽ ഇന്ത്യയിൽ തിരിച്ചെത്തിയ അദ്ദേഹം സ്വീഡനിൽ നിന്ന് ഏകദേശം 3,864 ഡോളർ (ഏകദേശം 3.2 ലക്ഷം രൂപ) ചെലവിൽ ഒരു ഓട്ടമേറ്റഡ് സംവിധാനം ഇറക്കുമതി ചെയ്‌തു. ഒരു സ്‌റ്റിയറിങ് മോട്ടോർ, സാറ്റലൈറ്റ് സിഗ്നലുകൾ, ഡേറ്റ വിശകലനം ചെയ്യുന്ന എഐ സോഫ്റ്റ്‌വെയർ എന്നിവ അടങ്ങുന്നതായിരുന്നു ഈ സംവിധാനം.

"എന്റെ അച്ഛനും മുത്തച്‌ഛനും ചെയ്‌ത അതേ തൊഴിൽ തന്നെ ആധുനിക സാങ്കേതികവിദ്യയുടെ സഹായത്തോടെ ചെയ്യാൻ കഴിയുന്നതിൽ എനിക്ക് അഭിമാനമുണ്ട്,' എന്നാണ് വിർക് പറഞ്ഞത്. ഈ സംവിധാനം ഉപയോഗിക്കുന്നതിലൂടെ ട്രാക്‌ടർ 0.01 സെൻ്റിമീറ്റർ കൃത്യതയോടെയാണ് പ്രവർത്തിക്കുന്നത്. വിത്ത് നടുക, വളം തളിക്കുക, വിളവെടുപ്പ് നടത്തുക എന്നിങ്ങനെ സകല പ്രവൃത്തികളും എഐ ഏറ്റെടുക്കുമ്പോൾ അധ്വാനഭാരം പകുതിയായി കുറയുന്നു. മാത്രമല്ല, പ്രവർത്തനത്തിനിടയിൽ എന്തെങ്കിലും പിശകുകൾ സംഭവിച്ചാൽ അത് ക്ലൗഡ് പ്ലാറ്റ്ഫോമിലേക്ക് അപ്ലോഡ് ചെയ്യുകയും സോഫ്റ്റ്‌വെയർ കമ്പനി അത് വിശകലനം ചെയ്ത് കൃത്യമായ നിർദേശങ്ങൾ തിരികെ നൽകുകയും ചെയ്യുന്നു.

ആഗോളതലത്തിൽ എഐ രംഗത്തുണ്ടാകുന്ന വളർച്ചയിൽ ഇന്ത്യ ഒരു പ്രധാന പങ്കാളിയാകാൻ ഒരുങ്ങുകയാണ്. ഇതിൻ്റെ ഭാഗമായി ന്യൂഡൽഹിയിൽ നടന്ന അഞ്ച് ദിവസത്തെ എഐ ഉച്ചകോടിയിൽ ലോകനേതാക്കളും പ്രമുഖ കമ്പനികളുടെ സിഇഒമാരും പങ്കെടുത്തു. 100 കോടിയോളം ഇൻ്റർനെറ്റ് ഉപഭോക്‌താക്കളുള്ള ഇന്ത്യ, മൈക്രോസോഫ്റ്റ്, ഗൂഗിൾ തുടങ്ങി ആഗോള ഭീമന്മാരുടെ പ്രധാന ലക്ഷ്യസ്‌ഥാനം കൂടിയാണ്.

എഐ ഇൻഫ്രാസ്ട്രക്‌ചർ വികസിപ്പിക്കുന്നതിനായി 17.5 ബില്യൺ ഡോളറിന്റെ നിക്ഷേപമാണ് മൈക്രോസോഫ്റ്റ് പ്രഖ്യാപിച്ചത്. അതേസമയം, ഗൂഗിൾ ഇന്ത്യയിൽ ആദ്യത്തെ എഐ ഹബ്ബ് സ്‌ഥാപിക്കുന്നതിനായി 15 ബില്യൺ ഡോളർ നിക്ഷേപിക്കുമെന്നും ഉറപ്പ് നൽകി.

. വെല്ലുവിളികളും പരിമിതികളും

സംവിധാനങ്ങളും വേണ്ടുവോളം നിക്ഷേപങ്ങളും ഉണ്ടെങ്കിലും എല്ലാം ശുഭകരമാണെന്ന് ഇതിനർഥമില്ല. അമേരിക്കയിലെ ഓപ്പൺ എഐ (OpenAI) പോലെയോ ചൈനയിലെ ഡീപ് സീക്ക് (DeepSeek) പോലെയോ സ്വന്തമായി ഒരു വലിയ എഐ മോഡൽ വികസിപ്പിച്ചെടുക്കാൻ ഇന്ത്യക്ക് ഇതുവരെ കഴിഞ്ഞിട്ടില്ല. ഇതിന് പ്രധാനമായും മൂന്ന് തടസ്സങ്ങളാണുള്ളത്. സെമികണ്ടക്‌ടർ ചിപ്പുകളുടെ കുറവ് തന്നെയാണ് പ്രധാന കാരണം. ഉയർന്ന തോതിലുള്ള, അതിവേഗ കംപ്യൂട്ടിങ്ങിന് ആവശ്യമായ ചിപ്പുകൾ ലഭിക്കാൻ പ്രയാസമാണ്. മറ്റൊന്ന് നൂറുകണക്കിന് പ്രാദേശിക ഭാഷകളുള്ള ഇന്ത്യയിൽ എഐയെ എല്ലാ ഭാഷകളും പഠിപ്പിക്കുക എന്നത് ശ്രമകരമായ ദൗത്യമാണ്. ഇതോടൊപ്പം സാങ്കേതികവിദ്യ മാറുന്നതിനനുസരിച്ച് സ്വയം മാറാൻ കഴിയാത്തവർക്ക് ജോലി നഷ്‌ടപ്പെടുന്ന അവസ്‌ഥയുണ്ട്. ഉദാഹരണത്തിന്, ടാറ്റ കൺസൾട്ടൻസി സർവീസസ് കഴിഞ്ഞ വർഷം എഐ മാറ്റങ്ങളുടെ ഭാഗമായി 12,000ത്തോളം ജീവനക്കാരെ ഒഴിവാക്കിയിരുന്നു.

ഭാവി ഇന്ത്യ

വീർ വിർകിനെപ്പോലെയുള്ള കർഷകരുടെ മുന്നേറ്റം തെളിയിക്കുന്നത് എഐ എന്നത് മനുഷ്യന് പകരക്കാരനല്ല, മറിച്ച് മനുഷ്യൻ്റെ ശേഷി വർധിപ്പിക്കുന്ന ഒരു ഉപകരണമാണ് എന്നാണ്. കൃഷിയിൽ കൃത്യത ഉറപ്പാക്കാനും വേഗം കൈവരിക്കാനും ഇത് സഹായിക്കുന്നു. ഇന്ത്യയിലെ എഐ വിപ്ലവം ഇപ്പോഴും അതിന്റെ പ്രാരംഭ ഘട്ടത്തിലാണ്. എന്നാൽ രാജ്യത്തെ ഡിജിറ്റൽ പശ്ചാത്തലവും സർക്കാരിൻ്റെ പ്രോത്സാഹനവും കണക്കിലെടുക്കുമ്പോൾ വരും വർഷങ്ങളിൽ ഇന്ത്യ എഐ ലോകത്തെ ഒരു പവർഹൗസ് ആയി മാറുമെന്ന കാര്യത്തിൽ സംശയമില്ല. പാരമ്പര്യത്തെയും സാങ്കേതികവിദ്യയെയും എങ്ങനെ സമന്വയിപ്പിക്കാം എന്നതിന്റെ ഉത്തമ മാതൃകയാകാൻ ഈ മാറ്റത്തിലൂടെ ഇന്ത്യയ്ക്ക് സാധിക്കും.