സംസ്ഥാനത്ത് പാൽവില വർധിപ്പിച്ചിട്ടും പ്രതിസന്ധി മാറാതെ ക്ഷീരകർഷകർ.

സംസ്ഥാനത്ത് പാൽവില വർധിപ്പിച്ചിട്ടും പ്രതിസന്ധി മാറാതെ ക്ഷീരകർഷകർ. ഉത്പാദിപ്പിക്കുന്ന പാലിന് വില നിർണയിക്കാനുള്ള അവകാശം കർഷകർക്കില്ലാത്തതും പ്രഖ്യാപിച്ച പല പദ്ധതികളും പാതിവഴിയിൽ നിലയ്ക്കുന്നതുമാണ് ക്ഷീരമേഖലയെ പ്രതിസന്ധിയിലാക്കുന്നത്.
സംസ്ഥാനത്തെ 3,320 ക്ഷീരസഹകരണ സംഘങ്ങളിലായി പ്രതിദിനം 3.21 ലക്ഷം കർഷകരാണ് പാൽ നൽകുന്നത്. പ്രതിദിനം 25 ലക്ഷം ലിറ്ററിലധികം പാൽ കേരളത്തിൽ ആവശ്യമുണ്ടെങ്കിലും 17.8 ലക്ഷം ലിറ്റർ മാത്രമാണ് ഇവിടെ സംഭരിക്കാൻ കഴിയുന്നത്.

വർധനവ് പേരിൽ മാത്രം; കർഷകന് കിട്ടുന്നത് 46-47 രൂപ

പാലിന്റെ കൊഴുപ്പിന്റെയും എസ്.എൻ.എഫിന്റെയും അടിസ്ഥാനത്തിൽ സംഭരണവിലയിൽ 3.21 രൂപ മുതൽ 5.25 രൂപ വരെയാണ് അടുത്തിടെ വർധിപ്പിച്ചത്. മിൽമയുടെ പുതുക്കിയ ചാർട്ട് പ്രകാരം കുറഞ്ഞ വില ലിറ്ററിന് 41.50 രൂപയും കൂടിയ വില 67.91 രൂപയുമാണ്. എന്നാൽ കേരളത്തിൽ ഉത്പാദിപ്പിക്കപ്പെടുന്ന പാലിൽ കൊഴുപ്പിന്റെ അളവ് പൊതുവെ കുറവായതിനാൽ പുതിയ വർധനവ് വന്നാൽപോലും കർഷകന് ശരാശരി 46 മുതൽ 47 രൂപ വരെ മാത്രമാണ് ഒരു ലിറ്ററിൽ നിന്നും ലഭിക്കുക.

വാഗ്ദാനങ്ങൾ കടലാസിൽ

ക്ഷീരകർഷകരെ സഹായിക്കാനായി സർക്കാർ പ്രഖ്യാപിച്ച പല പദ്ധതികളും എങ്ങുമെത്തുന്നില്ല എന്നതും പ്രധാന വെല്ലുവിളിയാണ്.
• ത്രിതല പഞ്ചായത്തുകൾ വഴി നടപ്പാക്കിയ 'മിൽക്ക് ഇൻസെന്റീവ് പദ്ധതി' പ്രകാരം ലിറ്ററിന് മൂന്നുരൂപ അധികമായി കർഷകർക്ക് ലഭിച്ചിരുന്നു. എന്നാൽ ഇത് വർഷം മുഴുവൻ ലഭ്യമാക്കാൻ അധികൃതർക്ക് കഴിഞ്ഞിട്ടില്ല.
• മൃഗചികിത്സാ ചെലവ് കുറയ്ക്കുന്നതിനായി രാത്രികാല ചികിത്സാ സൗകര്യങ്ങൾ ഒരുക്കുമെന്ന് പ്രഖ്യാപിച്ചിരുന്നെങ്കിലും ഭൂരിഭാഗം സ്ഥലങ്ങളിലും ഇതൊരു യാഥാർഥ്യമായിട്ടില്ല.

ഉത്പാദനച്ചെലവ് കുറയ്ക്കണം

ക്ഷീരമേഖലയിലെ പ്രതിസന്ധി മറികടക്കാൻ ഉത്പാദനച്ചെലവ് കുറയ്ക്കുക മാത്രമാണ് ഏക പോംവഴി. ഇതിനായി ക്ഷീരസഹകരണ സംഘങ്ങൾ വഴി നൽകുന്ന കാലിത്തീറ്റ, ചോളപ്പുല്ല്, സൈലേജ് എന്നിവയ്ക്ക് സബ്‌സിഡി നൽകണമെന്നാണ് കർഷകരുടെ പ്രധാന ആവശ്യം. കൂടാതെ മിൽക്ക് ഇൻസെന്റീവ് പദ്ധതി പ്രകാരമുള്ള മൂന്നുരൂപ ധനസഹായം വർഷം മുഴുവനും ലഭ്യമാക്കാനും പശുക്കൾക്ക് സൗജന്യ ഇൻഷുറൻസ് പരിരക്ഷ നൽകാനും സർക്കാർ തയ്യാറായാൽ മാത്രമേ കർഷകർക്ക് ഈ മേഖലയിൽ പിടിച്ചുനിൽക്കാൻ സാധിക്കൂ.