ഗിന്നസ് റെക്കോർഡിട്ട മാമ്പഴങ്ങളിലെ 'മധുരരാജ'; ലോകത്തിലെ ഏറ്റവും മധുരമുള്ള മാമ്പഴത്തെക്കുറിച്ച് അറിയാമോ?

പഴങ്ങളുടെ രാജാവാണ് മാമ്പഴമെങ്കിൽ, ആ മാമ്പഴങ്ങളിലെ തന്നെ മധുരരാജാവാണ് ഫിലിപ്പീൻസിൽ നിന്നുള്ള 'കാരബാവോ' (Carabao Mango). അസാധാരണമായ മധുരത്തിന്റെ പേരിൽ ഗിന്നസ് വേൾഡ് റെക്കോർഡ്സ് സ്വന്തമാക്കിയ ലോകത്തിലെ ഒരേയൊരു മാമ്പഴ ഇനമാണിത്. മധുരത്തിന്റെ കാര്യത്തിൽ മറ്റ് മാമ്പഴ ഇനങ്ങളെയെല്ലാം പിന്നിലാക്കുന്ന ഈ ഫിലിപ്പീൻ മാമ്പഴത്തിന് ലോകമെമ്പാടും വലിയൊരു ആരാധകവൃന്ദം തന്നെയുണ്ട്.

എന്താണ് കാരബാവോയുടെ പ്രത്യേകത?

1995-ലാണ് ലോകത്തിലെ ഏറ്റവും മധുരമുള്ള മാമ്പഴമായി ഗിന്നസ് ബുക്ക് കാരബാവോയെ ഔദ്യോഗികമായി പ്രഖ്യാപിക്കുന്നത്. ഇതിന്റെ അമിത മധുരത്തിന് പിന്നിലെ രഹസ്യം പഴങ്ങളിലെ പഞ്ചസാരയുടെ അളവ് സൂചിപ്പിക്കുന്ന ഉയർന്ന 'ബ്രിക്സ് ലെവൽ' ആണ്. പൂർണ്ണമായി പഴുക്കുമ്പോൾ പുളിപ്പ് തീരെയില്ലാത്ത ഇതിന്റെ മാംസളമായ ഭാഗം നൂറ് ശതമാനം നാരുകളില്ലാത്തതാണ്. വായിലിട്ടാൽ വെണ്ണ പോലെ അലിഞ്ഞുപോകുന്ന ഒരു ക്രീമി ഫീൽ ഈ മാമ്പഴം നൽകുന്നു.

രൂപത്തിലും കേമൻ

സാധാരണയായി 12.5 സെന്റീമീറ്ററോളം നീളമുള്ള ഇവയ്ക്ക് വൃക്കയുടെ ആകൃതിയാണുള്ളത്. പഴുത്തു പാകമാകുമ്പോൾ തൊലിയുടെ പച്ച നിറം മാറി തിളക്കമുള്ള സ്വർണ്ണ മഞ്ഞ നിറമാകും. 'ഫിലിപ്പീൻ മാമ്പഴം', 'മനില മാമ്പഴം' എന്നീ പേരുകളിലും ഇവ അറിയപ്പെടുന്നു.

പച്ചമാങ്ങക്ക് കടുത്ത പുളിപ്പ്!

ഫിലിപ്പീൻസിൽ കാരബാവോയുടെ 14 വ്യത്യസ്ത ഇനങ്ങൾ കൃഷി ചെയ്യുന്നുണ്ട്. ഇതിൽ സാംബലെസ് പ്രവിശ്യയിൽ വിളയുന്ന 'സ്വീറ്റ് എലീന' (Sweet Elena) ആണ് കൂട്ടത്തിൽ ഏറ്റവും മധുരമുള്ളത്. എന്നാൽ പഴുക്കുമ്പോൾ ഇത്രയും മധുരം നൽകുന്ന ഈ മാങ്ങ, പച്ചയായിരിക്കുമ്പോൾ കടുത്ത പുളിപ്പുള്ളതാണ്. അതിനാൽ ഫിലിപ്പീൻസുകാർ പച്ചമാങ്ങ ഉപ്പോ വിനാഗിരിയോ അല്ലെങ്കിൽ അവരുടെ പ്രശസ്തമായ ചെമ്മീൻ പേസ്റ്റോ ചേർത്താണ് കഴിക്കാറുള്ളത്.
അൽഫോൻസോ, ദശേരി തുടങ്ങിയ ഇന്ത്യൻ മാമ്പഴങ്ങൾ അവയുടെ സവിശേഷമായ സുഗന്ധത്തിനും മധുരത്തിന്റെയും നേരിയ പുളിപ്പിന്റെയും കൃത്യമായ അനുപാതത്തിനും പേരുകേട്ടതാണ്. എന്നാൽ, മായം ചേരാത്ത ശുദ്ധമായ മധുരമാണ് നിങ്ങൾക്ക് വേണ്ടതെങ്കിൽ ആ കിരീടം എക്കാലത്തും കാരബാവോയ്ക്ക് സ്വന്തമാണ്.