വ്യാപകമായ നാശനഷ്ടങ്ങൾക്കിടയിലും ഗസയിലെ കാർഷിക, മൃഗസംരക്ഷണ മേഖലകളിൽ ഉണർവ്.

ഇസ്രായേൽ ആക്രമണങ്ങളെത്തുടർന്ന് കനത്ത നാശനഷ്ടങ്ങൾ നേരിട്ട ഗസയിലെ കാർഷിക, മൃഗസംരക്ഷണ മേഖലകൾ പതിയെ തിരിച്ചുവരവിന്റെ പാതയിലാണെന്ന് ഐക്യരാഷ്ട്രസഭയുടെ ഫുഡ് ആൻഡ് അഗ്രികൾച്ചർ ഓർഗനൈസേഷൻ (FAO). എഫ്.എ.ഒയും (FAO) ഉപഗ്രഹ വിവരങ്ങൾ ശേഖരിക്കുന്ന യുനോസാറ്റും (UNOSAT) സംയുക്തമായി നടത്തിയ വിലയിരുത്തലിലാണ് ഗസയിലെ ഭക്ഷ്യോൽപ്പാദന മേഖലയിലെ ഈ ചെറിയ മാറ്റങ്ങൾ രേഖപ്പെടുത്തിയത്.

ഹരിതഗൃഹങ്ങളുടെ പുനർനിർമ്മാണം:

ഗസയിലെ 81 ശതമാനത്തിലധികം ഹരിതഗൃഹങ്ങളും (1325 ഹെക്ടറിൽ 1094 ഹെക്ടർ) തകർക്കപ്പെട്ട നിലയിലാണെങ്കിലും, ചിലയിടങ്ങളിൽ അവയുടെ പുനർനിർമ്മാണം കർഷകർ ആരംഭിച്ചിട്ടുണ്ട്. 2025 ഒക്ടോബറിനും 2026 ഏപ്രിലിനും ഇടയിൽ 24 ഹെക്ടറോളം വരുന്ന തകർന്ന ഹരിതഗൃഹങ്ങൾ കർഷകർ നന്നാക്കിയെടുത്തു. ഇതിൽ ഭൂരിഭാഗവും ഖാൻ യൂനിസിലാണ്. കൂടാതെ 22 ഹെക്ടറിൽ പുതിയ ഹരിതഗൃഹങ്ങൾ നിർമ്മിക്കാനും കർഷകർക്ക് കഴിഞ്ഞിട്ടുണ്ട്.

മൃഗസംരക്ഷണ മേഖലയിലെ വർദ്ധനവ്:

2023 ഒക്ടോബറിൽ സംഘർഷം രൂക്ഷമായതിന് ശേഷം ആദ്യമായി ആടുവളർത്തൽ മേഖലയിൽ വർദ്ധനവ് രേഖപ്പെടുത്തി. 2025 നവംബറിനും 2026 മെയ് മാസത്തിനും ഇടയിൽ ചെമ്മരിയാടുകളുടെ എണ്ണത്തിൽ 33 ശതമാനവും കോലാടുകളുടെ എണ്ണത്തിൽ 8 ശതമാനവും വർദ്ധനവുണ്ടായി. പാൽ, മാംസം എന്നിവയുടെ പ്രാദേശിക ലഭ്യത വർദ്ധിപ്പിക്കാൻ ഇത് സഹായിക്കും. വെടിനിർത്തലിന് ശേഷം ലഭ്യമായ അടിയന്തര സഹായങ്ങളാണ് ഈ മാറ്റത്തിന് പ്രധാന കാരണം.

ചെറിയ ഉണർവുകൾ കാണിക്കുന്നുണ്ടെങ്കിലും കാർഷിക മേഖലയിലെ പ്രതിസന്ധി ഇപ്പോഴും തുടരുകയാണ്:

• ഗസയിലെ 87 ശതമാനം കൃഷിഭൂമിയും തകർന്ന നിലയിലാണ്.

• ജലസേചന സംവിധാനങ്ങൾ, സംഭരണശാലകൾ, കാർഷികോപകരണങ്ങൾ എന്നിവയ്ക്ക് വലിയ നാശനഷ്ടങ്ങൾ സംഭവിച്ചിട്ടുണ്ട്.


• കാർഷിക-ഭക്ഷ്യ മേഖലയ്ക്ക് ഇതുവരെ 1.44 ബില്യൺ ഡോളറിന്റെ അടിസ്ഥാന സൗകര്യ നഷ്ടവും 1.46 ബില്യൺ ഡോളറിന്റെ ഉൽപ്പാദന നഷ്ടവുമാണ് ഉണ്ടായിരിക്കുന്നത്.

കർഷകർ നേരിടുന്ന വെല്ലുവിളികൾ

"ലഭ്യമായ എല്ലാ സ്ഥലങ്ങളിലും കൃഷിയിറക്കാൻ ഗസയിലെ കർഷകർ തയ്യാറാണ്, എന്നാൽ അവർക്ക് കൃഷിഭൂമിയിലേക്കുള്ള പ്രവേശനവും വളം, വിത്ത് തുടങ്ങിയവയും അടിയന്തരമായി ആവശ്യമാണ്," എഫ്.എ.ഒ ഡെപ്യൂട്ടി ഡയറക്ടർ ജനറൽ ബെത്ത് ബെക്ഡോൾ വ്യക്തമാക്കി.
സുരക്ഷാ കാരണങ്ങൾ പറഞ്ഞ് ഏർപ്പെടുത്തിയിട്ടുള്ള നിയന്ത്രണങ്ങൾ കാർഷിക മേഖലയുടെ തിരിച്ചുവരവിന് വലിയ തടസ്സമാണ് സൃഷ്ടിക്കുന്നത്. അടിയന്തര കാർഷിക സഹായങ്ങൾ എത്തിക്കുന്നതിനും അവശ്യവസ്തുക്കൾ ഇറക്കുമതി ചെയ്യുന്നതിനും വിലക്കുണ്ട്. അതിനാൽ വിത്തുകൾ, വളം, ജലസേചന ഉപകരണങ്ങൾ എന്നിവയ്ക്ക് കടുത്ത ക്ഷാമമാണ് നേരിടുന്നത്. ലഭ്യമുള്ളവയ്ക്ക് സാധാരണക്കാർക്ക് താങ്ങാനാവാത്ത വില നൽകേണ്ടിയും വരുന്നു.

എഫ്.എ.ഒ നൽകുന്ന പിന്തുണ

കാർഷിക മേഖലയെ പുനരുജ്ജീവിപ്പിക്കുന്നതിനായി എഫ്.എ.ഒ മികച്ച പിന്തുണയാണ് നൽകുന്നത്:

• നിലവിൽ ഗസയിലെ 1500 ചെറുകിട കർഷകർക്ക് പച്ചക്കറി കൃഷിക്കായി എഫ്.എ.ഒ സാമ്പത്തിക സഹായം നൽകുന്നുണ്ട്. ഇത് വഴി ഒരു ലക്ഷത്തിലധികം ആളുകൾക്ക് ആവശ്യമായ പച്ചക്കറികൾ ഉൽപ്പാദിപ്പിക്കാൻ കഴിയും.

• മൃഗസംരക്ഷണത്തിനായി പ്രതിമാസം 600 ടൺ കാലിത്തീറ്റ വിതരണം ചെയ്യുന്നുണ്ട്.


• സംഘർഷം ആരംഭിച്ചതിന് ശേഷം 5000-ലധികം കുടുംബങ്ങൾക്കായി 6000 ടൺ കാലിത്തീറ്റയും വെറ്ററിനറി മരുന്നുകളും വിതരണം ചെയ്തു.