മികച്ച വിളവും ലാഭവും; കേരളത്തിന്റെ കാലാവസ്ഥയ്ക്ക് യോജ്യമായ 5 വിളവിനങ്ങൾ പുറത്തിറക്കി

2026 ജൂണിൽ കൂടിയ സംസ്ഥാന സീഡ് സബ് കമ്മിറ്റിയുടെ അംഗീകാരത്തോടെ, കേരളത്തിലെ കാലാവസ്ഥയ്ക്കും കൃഷിരീതികൾക്കും അനുയോജ്യമായ അഞ്ച് പുതിയ മികച്ച വിള ഇനങ്ങളാണ് കേരള കാർഷിക സർവകലാശാല (KAU) പുറത്തിറക്കിയത്. കർഷകർക്ക് മികച്ച വിളവും ഗുണനിലവാരവും സാമ്പത്തിക നേട്ടവും ഉറപ്പാക്കുക എന്നതാണ് ഇവയുടെ ലക്ഷ്യം.

പുതുതായി പുറത്തിറക്കിയ അഞ്ച് ഇനങ്ങൾ താഴെ പറയുന്നവയാണ്:

1. KAU തേജസ്വിനി (പച്ചമുളക്)

• പ്രത്യേകതകൾ: നീളമേറിയതും മികച്ച വിളവ് തരുന്നതുമായ ഇനം. മിതമായ എരിവുള്ള ഇവ ബാക്ടീരിയൽ വാട്ടം, വൈറസ് രോഗങ്ങൾ എന്നിവയെ ചെറുക്കാൻ ശേഷിയുള്ളതാണ്.
• വിളവ്: ഹെക്ടറിന് ശരാശരി 32.5 ടൺ. വാണിജ്യ കൃഷിക്കും വീട്ടുവളപ്പിലെ കൃഷിക്കും ഒരുപോലെ അനുയോജ്യം.

2. KAU മേധ (ബ്രാഹ്മി)

• പ്രത്യേകതകൾ: മധ്യകേരളത്തിന് പ്രത്യേകം അനുയോജ്യമായ ഇനം. ഉയർന്ന ബയോമാസ് ഉൽപാദനത്തിനൊപ്പം ഔഷധ മൂല്യമായ ബാക്കോസൈഡിന്റെ ഉയർന്ന സാന്നിധ്യവും ഇതിന്റെ പ്രത്യേകതയാണ്.
• വിളവ്: ഹെക്ടറിന് 34-36 ടൺ പച്ചമരുന്നും 5-6 ടൺ ഉണങ്ങിയ ബ്രാഹ്മിയും ലഭിക്കും.

3. KAU സൗഗന്ധിക (രാമച്ചം)

• പ്രത്യേകതകൾ: 1.4% അവശ്യ എണ്ണ അടങ്ങിയിട്ടുള്ള, മികച്ച വേരു വളർച്ചയുള്ള ഇനം. വേരുകൾക്കും എണ്ണയ്ക്കുമെല്ലാമായി മധ്യകേരളത്തിലെ തുറസ്സായ പ്രദേശങ്ങളിൽ കൃഷി ചെയ്യാൻ മികച്ചതാണ്.
• വിളവ്: ഹെക്ടറിന് 6.1-7.8 ടൺ ഉണങ്ങിയ വേര് ലഭിക്കും.

4. KAU കൊച്ചിൻ പ്രൈഡ് (ഇഞ്ചി)

• പ്രത്യേകതകൾ: പരമ്പരാഗത കൊച്ചിൻ ഇഞ്ചിയുടെ സവിശേഷമായ എരിവും മണവും നിലനിർത്തുന്നതിനൊപ്പം ഉയർന്ന സിഞ്ചിബെറീൻ, സ്റ്റാർച്ച് എന്നിവയും അടങ്ങിയിരിക്കുന്നു. അഴുകൽ രോഗത്തെ ചെറുക്കുന്ന ഇവ തെങ്ങിൻ തോപ്പുകളിൽ ഇടവിളയായും കൃഷി ചെയ്യാം. ഇടുക്കി, കോട്ടയം ജില്ലകളിൽ ചുക്ക് നിർമ്മാണത്തിന് ഇത് ശുപാർശ ചെയ്യുന്നു.
• വിളവ്: ഹെക്ടറിന് ശരാശരി 36.3 ടൺ.

5. KAU ഗോൾഡൻ ഫിംഗർ (മഞ്ഞൾ)

• പ്രത്യേകതകൾ: ഉയർന്ന കുർക്കുമിൻ (8.65%) അടങ്ങിയ ആലപ്പി ഫിംഗർ മഞ്ഞൾ ഇനം. മികച്ച വിളവും കയറ്റുമതി ഗുണനിലവാരവുമുള്ള ഈ ഇനം കോട്ടയം ജില്ലയിലെ കൃഷിക്ക് അനുയോജ്യമാണ്.
• വിളവ്: ഹെക്ടറിന് 39-42 ടൺ പച്ചമഞ്ഞൾ.