ചൈന ഗ്ലാസ് താഴ്ത്തി; ആഗോള വൈൻവിപണി വൻ പ്രതിസന്ധിയിൽ

ലോകത്തെ ഏറ്റവും വലിയ വൈൻ ഉപഭോക്താക്കളിലൊന്നായ ചൈന വിപണിയിൽ നിന്ന് പിന്നോട്ട് പോകുന്നത് ആഗോള മദ്യവ്യവസായത്തിന് വൻ തിരിച്ചടിയായി. ഒരു കാലത്ത് ആഗോള വൈൻ ഇറക്കുമതിയുടെ 8 ശതമാനവും കൈക്കലാക്കിയിരുന്ന ചൈനയിൽ ഇപ്പോൾ ഡിമാൻഡ് കുത്തനെ ഇടിഞ്ഞിരിക്കുകയാണ്. 2018-ൽ 3 ബില്യൺ ഡോളറിൻ്റെ വിദേശ വൈൻ ഇറക്കുമതി ചെയ്‌തിരുന്ന സ്ഥാനത്ത് ഇന്ന് അതിൻ്റെ പകുതി പോലും എത്തുന്നില്ല. സാമ്പത്തിക മാന്ദ്യവും പ്രോപ്പർട്ടി വിപണിയിലെ തകർച്ചയും ഉപഭോക്താക്കളുടെ ചെലവഴിക്കൽ ശേഷി കുറച്ചതാണ് ഈ മാറ്റത്തിന് പ്രധാന കാരണം.

പാർട്ടികളിൽ മദ്യനിരോധനം; കുപ്പി തുറക്കാതെ ഉദ്യോഗസ്ഥർ

2025 മെയ് മാസത്തിൽ സർക്കാർ-കമ്മ്യൂണിസ്റ്റ് പാർട്ടി പരിപാടികളിൽ മദ്യം നിരോധിക്കാനുള്ള നീക്കം വിപണിക്ക് കനത്ത ആഘാതമേൽപ്പിച്ചു. ചൈനയിലെ വൈൻ ഉപഭോഗത്തിൻ്റെ വലിയൊരു ഭാഗവും ഔദ്യോഗിക വിരുന്നുകളെയും ബിസിനസ് മീറ്റിംഗുകളെയും ആശ്രയിച്ചായിരുന്നു. എന്നാൽ പുതിയ കർശന നിയന്ത്രണങ്ങൾ വന്നതോടെ സർക്കാർ ഉദ്യോഗസ്ഥരും കമ്പനികളും വൈൻ വിളമ്പാൻ ഭയപ്പെടുകയാണ്. ബിസിനസ് സംസ്കാരത്തിൻ്റെ ഭാഗമായിരുന്ന റെഡ് വൈൻ ഇന്ന് ചൈനയിൽ പദവിയുടെ അടയാളമല്ലാതായി മാറിക്കഴിഞ്ഞു.

കെട്ടിക്കിടക്കുന്നത് കോടികളുടെ സ്റ്റോക്ക്

ഡിമാൻഡ് കുറഞ്ഞതോടെ ലോകപ്രശസ്‌ത വൈൻ കമ്പനികളെല്ലാം പ്രതിസന്ധിയിലാണ്. ട്രഷറി വൈൻ എസ്റ്റേറ്റ്സ് പോലുള്ള കമ്പനികളുടെ 150 മില്യൺ ഡോളറിൻ്റെ ഉൽപ്പന്നങ്ങളാണ് ചൈനീസ് വെയർഹൗസുകളിൽ വിറ്റുപോകാതെ കെട്ടിക്കിടക്കുന്നത്. ഓസ്ട്രേലിയയിലെ പല കയറ്റുമതിക്കാർക്കും കഴിഞ്ഞ വർഷം ഒരു വിൽപ്പന പോലും നടത്താനായില്ല. ഫ്രാൻസിലെ ബോർഡോയിൽ അധികമായി വരുന്ന വൈൻ ഉൽപ്പാദനം നിയന്ത്രിക്കാനായി 20 ശതമാനത്തോളം മുന്തിരിത്തോട്ടങ്ങൾ വെട്ടിമാറ്റേണ്ടി വന്നു എന്നത് പ്രതിസന്ധിയുടെ ആഴം വ്യക്തമാക്കുന്നു.

പുതുതലമുറയ്ക്ക് താൽപ്പര്യമില്ല; വിപണി മാറ്റിപ്പിടിച്ച് ഉൽപ്പാദകർ

സാമ്പത്തിക കാരണങ്ങൾക്കപ്പുറം ചൈനയിലെ യുവതലമുറയുടെ മാറുന്ന താൽപ്പര്യങ്ങളും ഈ ഇടിവിന് കാരണമാണ്. വൈനിനെ ഒരു നിത്യജീവിത ശൈലിയുടെ ഭാഗമായി കാണാൻ യുവാക്കൾ തയ്യാറാകുന്നില്ല. ചൈനയെ വിശ്വസനീയമായ ഒരു വിപണിയായി ഇനി കാണാൻ കഴിയില്ലെന്ന് മനസ്സിലാക്കിയ ആഗോള ഉൽപ്പാദകർ ഇപ്പോൾ മറ്റു രാജ്യങ്ങളിലേക്ക് ശ്രദ്ധ തിരിക്കുകയാണ്.