മനുഷ്യർക്കും പരിസ്ഥിതിക്കും കടുത്ത ഭീഷണി; മാരക കീടനാശിനിയായ കാർബോസൾഫാൻ നിരോധിക്കാൻ കേന്ദ്ര സർക്കാർ

ഇന്ത്യയിലെ കാർഷിക മേഖലയിൽ കീടനാശിനികളുടെ ഉപയോഗത്തിൽ കൂടുതൽ നിയന്ത്രണങ്ങൾ കൊണ്ടുവരാൻ ഒരുങ്ങി കേന്ദ്ര സർക്കാർ. ഇതിന്റെ ഭാഗമായി മനുഷ്യർക്കും മൃഗങ്ങൾക്കും പരിസ്ഥിതിക്കും കടുത്ത ഭീഷണിയുയർത്തുന്ന 'കാർബോസൾഫാൻ' എന്ന കൊടുംവിഷമുള്ള കീടനാശിനി രാജ്യത്ത് പൂർണ്ണമായി നിരോധിക്കാൻ തീരുമാനിച്ചു. കേരളമുൾപ്പെടെയുള്ള സംസ്ഥാനങ്ങളിൽ 'മാർഷൽ' എന്ന ബ്രാൻഡിൽ വ്യാപകമായി വിറ്റഴിക്കപ്പെടുന്ന ഈ കീടനാശിനിയുടെ ഉപയോഗം വലിയ പാരിസ്ഥിതിക പ്രത്യാഘാതങ്ങൾ സൃഷ്ടിക്കുന്നതായി കണ്ടെത്തിയിട്ടുണ്ട്. നെല്ല്, പച്ചക്കറികൾ തുടങ്ങിയ വിളകളിലെ കീടനിയന്ത്രണത്തിനായി കർഷകർ ഉപയോഗിച്ചിരുന്ന ഈ രാസവസ്തു ജലജീവികൾക്കും പക്ഷികൾക്കും അത്യന്തം അപകടകരമായതിനാലാണ് കർശന നടപടിയുമായി കേന്ദ്ര കൃഷി മന്ത്രാലയം മുന്നോട്ട് വന്നിരിക്കുന്നത്.

കാർബോസൾഫാന്റെ ദൂഷ്യഫലങ്ങൾ വിലയിരുത്തുന്നതിനായി ഈ വർഷം ജനുവരിയിൽ കേന്ദ്ര സർക്കാർ ഒരു പ്രത്യേക വിദഗ്ധ സമിതിയെ നിയോഗിച്ചിരുന്നു. ആഗോളതലത്തിലുള്ള പഠനങ്ങളും പ്രത്യാഘാതങ്ങളും വിശദമായി പരിശോധിച്ച സമിതി ജൂൺ മാസത്തിൽ ഈ കീടനാശിനി പൂർണ്ണമായും നിരോധിക്കാൻ സർക്കാരിനോട് ശുപാർശ ചെയ്തു. ഇതിന്റെ അടിസ്ഥാനത്തിൽ ഓഗസ്റ്റ് ഇരുപത്തിയൊന്നിന് നിരോധനം സംബന്ധിച്ച കരട് വിജ്ഞാപനം കേന്ദ്ര ഗസറ്റിൽ പ്രസിദ്ധീകരിക്കുകയും ചെയ്തു. പൊതുജനങ്ങൾക്കും കർഷകർക്കും കീടനാശിനി വ്യാപാരികൾക്കും ഇത് സംബന്ധിച്ചുള്ള തങ്ങളുടെ അഭിപ്രായങ്ങൾ കേന്ദ്ര കൃഷി മന്ത്രാലയത്തെ അറിയിക്കാൻ സെപ്റ്റംബർ ഇരുപത് വരെ അവസരം നൽകിയിരുന്നു. ലഭിച്ച അഭിപ്രായങ്ങൾ കൂടി പരിഗണിച്ച ശേഷമായിരിക്കും സർക്കാർ അന്തിമ ഉത്തരവ് പുറത്തിറക്കുക.

അന്തിമ നിരോധന ഉത്തരവ് പ്രാബല്യത്തിൽ വരുന്നതോടെ രാജ്യത്ത് കാർബോസൾഫാന്റെ നിർമ്മാണം, ഇറക്കുമതി, വിൽപ്പന, വിതരണം, ഉപയോഗം എന്നിവയ്ക്ക് സമ്പൂർണ്ണ വിലക്ക് നിലവിൽ വരും. കൂടാതെ നിലവിൽ വിപണിയിലുള്ള ഈ രാസവസ്തു അടങ്ങിയ ഉൽപ്പന്നങ്ങളുടെ എല്ലാ രജിസ്ട്രേഷൻ സർട്ടിഫിക്കറ്റുകളും അടിയന്തരമായി തിരിച്ചുവിളിക്കാനും റദ്ദാക്കാനും കേന്ദ്ര സർക്കാർ സംസ്ഥാനങ്ങൾക്ക് നിർദ്ദേശം നൽകിയിട്ടുണ്ട്. അതിമാരകമായ കാർഷിക രാസവസ്തുക്കളുടെ ഉപയോഗം കുറയ്ക്കുന്നതിനും സുരക്ഷിതവും പരിസ്ഥിതി സൗഹൃദവുമായ കാർഷിക രീതികൾ പ്രോത്സാഹിപ്പിക്കുന്നതിനുമുള്ള കേന്ദ്ര സർക്കാരിന്റെ സുപ്രധാന ചുവടുവെപ്പായാണ് ഈ തീരുമാനത്തെ കാർഷിക ലോകം നോക്കിക്കാണുന്നത്.