കേരളത്തിൽ അടുത്ത ദിവസങ്ങളിൽ ശക്തമായ മഴയ്ക്കും ഇടിമിന്നലിനും സാധ്യത; വിവിധ ജില്ലകളിൽ മഞ്ഞ അലർട്ട്

സംസ്ഥാനത്ത് അടുത്ത അഞ്ച് ദിവസങ്ങളിൽ ഒറ്റപ്പെട്ട ശക്തമായ മഴയ്ക്കും ഇടിമിന്നലിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഇതിന്റെ പശ്ചാത്തലത്തിൽ വരും ദിവസങ്ങളിൽ വിവിധ ജില്ലകളിൽ മഞ്ഞ (യെല്ലോ) അലർട്ട് പ്രഖ്യാപിച്ചിട്ടുണ്ട്.

മഞ്ഞ അലർട്ട് പ്രഖ്യാപിച്ചിട്ടുള്ള ജില്ലകൾ:

സെപ്റ്റംബർ 18 (ഇന്ന്): ആലപ്പുഴ, കോട്ടയം, ഇടുക്കി

സെപ്റ്റംബർ 19: കോട്ടയം, ഇടുക്കി, മലപ്പുറം, കോഴിക്കോട്

സെപ്റ്റംബർ 20: കോട്ടയം, ഇടുക്കി, എറണാകുളം

അലർട്ട് പ്രഖ്യാപിച്ച ജില്ലകളിൽ ഒറ്റപ്പെട്ട ശക്തമായ മഴയ്ക്കാണ് സാധ്യത. സെപ്റ്റംബർ 20 വരെ വിവിധയിടങ്ങളിൽ ഇടിമിന്നലിന് സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ അറിയിച്ചു.

മിക്ക പ്രദേശങ്ങളിലും ഇടിയോടു കൂടിയ മഴ ലഭിക്കുന്നതിനാൽ താപനില കുറയുകയും അതുവഴി വൈദ്യുതി ഉപയോഗത്തിൽ കുറവുണ്ടാവുകയും ചെയ്യും. ഇത് പവർകട്ട് ഒഴിവാക്കാൻ സഹായിക്കുമെന്നാണ് പ്രതീക്ഷിക്കുന്നത്. വരാനിരിക്കുന്ന തുലാവർഷത്തിലും ശക്തമായ ഇടിമിന്നലിന് സാധ്യതയുണ്ട്.

കാലവർഷം നാളെയോടെ വടക്കുപടിഞ്ഞാറൻ ഇന്ത്യയിൽ നിന്ന് വിടവാങ്ങിത്തുടങ്ങും. ഒക്ടോബർ 15-ന് മുൻപായി കേരളത്തിൽ നിന്നും കാലവർഷം പൂർണ്ണമായി പിൻവാങ്ങുമെന്നാണ് പ്രതീക്ഷിക്കുന്നത്. ഇതിനുശേഷമാകും തുലാവർഷം ആരംഭിക്കുക. ഇത്തവണ തുലാവർഷം സാധാരണ നിലയിൽ ലഭിക്കാനാണ് സാധ്യതയെന്നും റിപ്പോർട്ടിൽ പറയുന്നു.