പച്ചച്ചാണകം ഇനി നേരിട്ട് ചെടികൾക്ക് നൽകേണ്ട; വിളവ് വർദ്ധിപ്പിക്കാൻ 'ചാണകം കൾച്ചർ' ചെയ്യാം

പച്ചച്ചാണകം നേരിട്ട് ചെടികൾക്ക് ഇട്ടുകൊടുക്കുന്നത് വേരുകൾ ചീയാനും കീടങ്ങൾ പെരുകാനും കാരണമാകുമെന്ന് കർഷകർക്ക് മുന്നറിയിപ്പ്. എന്നാൽ ചാണകം പുളിപ്പിച്ചോ മറ്റ് മിത്രസൂക്ഷ്മാണുക്കൾ ചേർത്തോ കൾച്ചർ ചെയ്ത് നൽകുമ്പോൾ ചെടികൾക്ക് വേഗത്തിൽ പോഷകങ്ങൾ ആഗിരണം ചെയ്യാൻ കഴിയും. മണ്ണിലെ രോഗകാരികളായ കുമിളുകളെ നശിപ്പിക്കാനും മണ്ണിന്റെ ഫലഭൂയിഷ്ഠിത വീണ്ടെടുക്കാനും വേരുകൾക്ക് കരുത്തുപകരാനും ഇത്തരം ജൈവരീതികൾ സഹായിക്കുന്നു. സാധാരണ കർഷകർക്ക് വളരെ എളുപ്പത്തിൽ തയ്യാറാക്കാവുന്ന മൂന്ന് പ്രധാന ചാണക കൾച്ചർ രീതികൾ പരിചയപ്പെടാം:

1. ചാണക സ്ലറി (ദ്രവ വളം)
ചെടികൾക്ക് പെട്ടെന്ന് വലിച്ചെടുക്കാൻ കഴിയുന്ന രൂപത്തിലുള്ള ദ്രാവക വളമാണിത്. ഇത് തയ്യാറാക്കാനായി അഞ്ച് കിലോ പച്ചച്ചാണകം, 10 ലിറ്റർ വെള്ളം, 250 ഗ്രാം ശർക്കര, 250 ഗ്രാം കടലപ്പിണ്ണാക്ക് എന്നിവയാണ് ആവശ്യമായിട്ടുള്ളത്. ഒരു വലിയ പാത്രത്തിൽ ഇവയെല്ലാം നന്നായി കലക്കി തണലത്തുവെക്കുക. ബാക്ടീരിയകളുടെ പ്രവർത്തനം വേഗത്തിലാക്കാൻ ദിവസവും രാവിലെയും വൈകുന്നേരവും ഘടികാരദിശയിൽ ഇളക്കിക്കൊടുക്കണം. 4 മുതൽ 7 ദിവസത്തിനുള്ളിൽ സ്ലറി തയ്യാറാകും. ഒരു ലിറ്റർ സ്ലറിക്ക് പത്ത് ലിറ്റർ വെള്ളം എന്ന കണക്കിൽ നേർപ്പിച്ച് മാത്രം ചെടികളുടെ ചുവട്ടിൽ ഒഴിച്ചുകൊടുക്കുക. നേർപ്പിക്കാതെ ഒഴിച്ചാൽ ഇതിലെ അമോണിയ കാരണം വേരുകൾ കരിഞ്ഞുപോകും. തയ്യാറാക്കിയ സ്ലറി ഒരാഴ്ചയ്ക്കുള്ളിൽ ഉപയോഗിച്ചു തീർക്കേണ്ടതാണ്.

2. ജീവാമൃതം
മണ്ണിലെ ബാക്ടീരിയകളെ വർദ്ധിപ്പിച്ച് മണ്ണിനെ ജീവസുറ്റതാക്കാൻ ഏറ്റവും മികച്ച രീതിയാണിത്. 200 ലിറ്റർ വെള്ളം, 10 കിലോ പച്ചച്ചാണകം, 5 മുതൽ 10 ലിറ്റർ വരെ നാടൻ പശുവിൻ മൂത്രം, 2 കിലോ ശർക്കര, 2 കിലോ കടലമാവോ ചെറുപയർ പൊടിയോ, കൂടാതെ രാസവളം ചേർക്കാത്ത ഒരു പിടി മേൽമണ്ണ് എന്നിവയാണ് ഇതിനായി വേണ്ടത്. ഒരു വലിയ ബാരലിൽ ഇവയെല്ലാം ചേർത്ത് ദിവസവും രണ്ടുനേരം നന്നായി ഇളക്കി തണലിൽ സൂക്ഷിക്കുക. 3 മുതൽ 4 ദിവസം കൊണ്ട് ജീവാമൃതം തയാറാകും. ഇത് ഒരു ലിറ്ററിന് പത്ത് ലിറ്റർ വെള്ളം ചേർത്ത് നേർപ്പിച്ച് നനവുള്ള മണ്ണിൽ ഒഴിച്ചുകൊടുക്കാം. തയാറാക്കി 7 ദിവസത്തിനുള്ളിൽ ഇത് ഉപയോഗിക്കണം, അല്ലെങ്കിൽ സൂക്ഷ്മാണുക്കളുടെ എണ്ണം കുറഞ്ഞുപോകും.

3. ട്രൈക്കോഡെർമ സമ്പുഷ്ട ചാണകം
കുമിൾരോഗങ്ങൾക്ക് എതിരെ പ്രവർത്തിക്കുന്ന ശക്തമായ ജൈവവളമാണിത്. 100 കിലോ പൊടിച്ച ഉണക്കച്ചാണകം (പച്ചച്ചാണകം പാടില്ല), 10 കിലോ വേപ്പിൻപിണ്ണാക്ക്, ഒരു കിലോ ട്രൈക്കോഡെർമ പൊടി എന്നിവയാണ് ഇതിനായി ആവശ്യമുള്ളത്. ചാണകത്തിൽ വേപ്പിൻപിണ്ണാക്കും ട്രൈക്കോഡെർമയും ചേർത്ത് ആവശ്യത്തിന് വെള്ളം തളിച്ച് നേരിയ ഈർപ്പം വരുത്തി നന്നായി ഇളക്കി യോജിപ്പിക്കണം (വെള്ളം കൂടരുത്). ഈ മിശ്രിതം തണലുള്ള തറയിൽ കൂട്ടിയിട്ട് നനഞ്ഞ ചാക്കുകൊണ്ട് മൂടിവെക്കുക. ആഴ്ചയിലൊരിക്കൽ ഇളക്കി ഈർപ്പം ഉറപ്പാക്കണം. 10-15 ദിവസം കഴിയുമ്പോൾ മുകളിൽ പച്ചനിറത്തിൽ പൂപ്പൽ പടരുന്നത് കാണാം. കുരുമുളകിന്റെ ദ്രുതവാട്ടം, ഇഞ്ചിയുടെ ചീയൽ, പച്ചക്കറികളുടെ വാട്ടരോഗം എന്നിവ തടയാൻ തടമൊന്നിന് ആവശ്യാനുസരണം ഇത് ഇട്ടുകൊടുക്കാം.

എന്തുകൊണ്ട് കൾച്ചർ ചെയ്ത വളങ്ങൾ?

കൾച്ചർ ചെയ്ത വളങ്ങൾ ഉപയോഗിക്കുന്നതിലൂടെ മണ്ണിൽ കോടിക്കണക്കിന് ഉപകാരികളായ സൂക്ഷ്മാണുക്കൾ വളരുകയും നൈട്രജൻ, ഫോസ്ഫറസ് എന്നിവ ചെടികൾക്ക് പെട്ടെന്ന് വലിച്ചെടുക്കാവുന്ന രൂപത്തിലാകുകയും ചെയ്യുന്നു. പച്ചച്ചാണകം മണ്ണിൽ ലയിക്കാൻ എടുക്കുന്ന കാലതാമസം ഒഴിവാക്കി ചെടികൾ പെട്ടെന്ന് തഴച്ചുവളരാൻ സ്ലറിയും ജീവാമൃതവും സഹായിക്കും. വേരുചീയലിന് കാരണമാകുന്ന മണ്ണിലെ കുമിളുകളെ ട്രൈക്കോഡെർമ നശിപ്പിക്കുന്നു. ഇതിനെല്ലാം പുറമെ, മണ്ണിൽ വായുസഞ്ചാരവും ഈർപ്പവും നിലനിർത്താൻ സഹായിക്കുന്നതിനൊപ്പം രാസവളങ്ങൾ മൂലം നശിച്ച മണ്ണിന്റെ സ്വാഭാവിക ഘടനയും ജീവനും തിരിച്ചുനൽകാനും ഈ ജൈവരീതികൾ കർഷകരെ സഹായിക്കും.