വീട്ടുമുറ്റത്തും ബാൽക്കണിയിലും ഇനി സുഗന്ധവ്യഞ്ജനങ്ങളുടെ റാണി; ചട്ടിയിലെ ഏലകൃഷിക്ക് ആവശ്യമായ പരിചരണങ്ങൾ അറിയാം

നറുമണവും മികച്ച സ്വാദും കൊണ്ട് സുഗന്ധവ്യഞ്ജനങ്ങളുടെ റാണി എന്നറിയപ്പെടുന്ന ഏലം വലിയ തോട്ടങ്ങളിൽ മാത്രം ഒതുങ്ങുന്ന ഒരു കൃഷിയല്ല. ശരിയായ പരിചരണവും അനുകൂലമായ കാലാവസ്ഥയും നൽകിയാൽ നമ്മുടെ വീടുകളിലെ ബാൽക്കണിയിലോ പൂന്തോട്ടത്തിലോ ചട്ടികളിൽ വെച്ച് വളരെ മനോഹരമായി ഏലം വളർത്തിയെടുക്കാൻ സാധിക്കും. പരിമിതമായ സ്ഥലത്തും മികച്ച രീതിയിൽ ഏലം കൃഷി ചെയ്യാനുള്ള ചില പൊടിക്കൈകൾ അറിഞ്ഞിരിക്കേണ്ടത് അത്യാവശ്യമാണ്.

ഏലത്തിന്റെ വേരുകൾക്ക് പടർന്നു വളരാൻ ആവശ്യത്തിന് ഇടം വേണ്ടതിനാൽ കുറഞ്ഞത് മുപ്പത് സെന്റീമീറ്റർ വീതിയും നല്ല ആഴവുമുള്ള ചട്ടികളോ പാത്രങ്ങളോ ആണ് കൃഷിക്കായി ആദ്യം തിരഞ്ഞെടുക്കേണ്ടത്. അമിതമായി വെള്ളം കെട്ടിക്കിടന്ന് വേരുകൾ അഴുകിപ്പോകാതിരിക്കാൻ ചട്ടിയുടെ അടിഭാഗത്ത് ധാരാളം ദ്വാരങ്ങൾ ഉണ്ടായിരിക്കണം. ഈർപ്പം നിലനിർത്തുന്നതും എന്നാൽ വെള്ളം എളുപ്പത്തിൽ വാർന്നുപോകുന്നതുമായ പോഷകസമൃദ്ധമായ മണ്ണാണ് ഏലത്തിന് ഏറ്റവും അനുയോജ്യം. നേരിയ അമ്ലഗുണമുള്ള മണ്ണാണെങ്കിൽ ഏലം വളരെ വേഗത്തിൽ വളരുന്നതാണ്.

പാചകത്തിന് ഉപയോഗിക്കുന്ന ഉണങ്ങിയ ഏലയ്ക്കയിലെ വിത്തുകൾ മുളയ്ക്കാത്തതിനാൽ നടാനായി പുതിയ വിത്തുകൾ തന്നെ ഉപയോഗിക്കാൻ ശ്രദ്ധിക്കണം. നടുന്നതിന് തലേദിവസം രാത്രി വിത്തുകൾ വെള്ളത്തിൽ കുതിർത്തു വയ്ക്കുന്നത് വേഗത്തിൽ മുളയ്ക്കാൻ സഹായിക്കും. ഈർപ്പവും ഫലഭൂയിഷ്ഠതയുമുള്ള മണ്ണിൽ ഭാഗികമായി തണലുള്ള ഒരിടത്ത് വിത്തുകൾ പാകാം. മുളച്ചുവരാൻ മുപ്പത് മുതൽ നാൽപ്പത് ദിവസം വരെ സമയമെടുക്കുന്നതിനാൽ ഈ കാലയളവിൽ മണ്ണ് അനക്കാതെ വെറുതെ വിടുകയും എപ്പോഴും ഈർപ്പം നിലനിർത്തുകയും വേണം.

മഴക്കാടുകളിലെ വലിയ മരങ്ങൾക്ക് താഴെ വളരുന്ന പ്രകൃതമുള്ള സസ്യമായതിനാൽ കഠിനമായ സൂര്യപ്രകാശം ഏലത്തിന് അനുയോജ്യമല്ല. അരിച്ചെത്തുന്ന വെളിച്ചമോ ഭാഗികമായ തണലോ ആണ് ഇതിന് ആവശ്യം. ഏലച്ചെടിയുടെ മണ്ണിന് എപ്പോഴും നേരിയ ഈർപ്പം ഉണ്ടായിരിക്കാൻ പ്രത്യേകം ശ്രദ്ധിക്കണം. മണ്ണ് ദീർഘനേരം പൂർണമായും ഉണങ്ങിപ്പോകാൻ അനുവദിക്കാതെ കൃത്യമായ ഇടവേളകളിൽ നനയ്ക്കണം. ഇലകളിൽ വെള്ളം തളിച്ചു കൊടുക്കുന്നത് ചെടിക്ക് ഉന്മേഷം നൽകും. എന്നാൽ അമിതമായ നനയും നീർവാർച്ചയില്ലായ്മയും വേരുകൾ അഴുകാൻ ഇടയാക്കുമെന്നതിനാൽ നനയ്ക്കുന്നതിന് മുൻപ് മണ്ണിന്റെ ഈർപ്പം പരിശോധിച്ച് ഉറപ്പുവരുത്തുന്നത് നന്നായിരിക്കും.

ഏലം വളരെ സാവധാനത്തിൽ മാത്രം വളരുന്ന ഒരു ചെടിയായതിനാൽ വിത്ത് പാകി കായ്ഫലം ലഭിക്കാൻ ഏകദേശം മൂന്ന് വർഷത്തോളം കാത്തിരിക്കേണ്ടി വരും. ചെടി പൂത്തു തുടങ്ങുമ്പോൾ തേനീച്ചകളും പ്രാണികളും സ്വാഭാവിക പരാഗണത്തിന് സഹായിക്കാറുണ്ട്. എന്നാൽ വീടിനുള്ളിലോ പ്രാണികളുടെ സാന്നിധ്യം കുറഞ്ഞ ഇടങ്ങളിലോ ആണ് ചെടിയെങ്കിൽ കൈകൊണ്ട് തന്നെ പരാഗണം നടത്തേണ്ടി വരും. ഏലയ്ക്കകൾ പാകമാകുമ്പോൾ അവ പിളരാൻ തുടങ്ങുകയോ ചെടിയിൽ നിന്ന് എളുപ്പത്തിൽ വിട്ടുപോരുകയോ ചെയ്യും. ഈ സമയത്ത് ഓരോ കായയും ചെടിക്ക് കേടുപാടുകൾ സംഭവിക്കാത്ത രീതിയിൽ ശ്രദ്ധയോടെ പറിച്ചെടുക്കാവുന്നതാണ്.