ഏലക്കായയുടെ തൂക്കവും ഗുണനിലവാരവും കുറയുന്നുണ്ടോ? വില്ലൻ ഈ കീടമാകാം! പരിഹാരങ്ങൾ ഇതാ 🌿 | Cardamom Thrips Management

ഏലക്കർഷകർക്ക് വലിയ തലവേദന സൃഷ്ടിക്കുന്ന ഒരു പ്രധാന കീടമാണ് ഏലത്തിലെ ഇലപ്പേൻ അഥവാ ത്രിപ്സ് (Cardamom thrips - Sciothrips cardamomi). ഏലക്കായയുടെ ഗുണനിലവാരം പൂർണ്ണമായും നശിപ്പിക്കുന്ന ഈ കീടത്തെ തുടക്കത്തിൽ തന്നെ കണ്ടെത്തി നിയന്ത്രിച്ചില്ലെങ്കിൽ കർഷകർക്ക് വലിയ സാമ്പത്തിക നഷ്ടം ഉണ്ടാകും.

കീടാക്രമണത്തിന്റെ ലക്ഷണങ്ങൾ

വിരിയാത്ത ഇലകൾ, പോളകൾ, പൂമൊട്ടുകൾ എന്നിവയ്ക്കുള്ളിലാണ് ഇവ പ്രധാനമായും കൂട്ടമായി വളരുകയും പെരുകുകയും ചെയ്യുന്നത്.

ചെടിയുടെ പുറമെയുള്ള ഭാഗങ്ങളിൽ നിന്നും ഈ കീടങ്ങൾ ഊറൽ വലിച്ചുകുടിക്കുന്നു.

പൂങ്കുലകളുടെ വളർച്ച മുരടിക്കാനും പൂമൊട്ടുകൾ കൊഴിഞ്ഞുപോവാനും ഇത് കാരണമാകുന്നു.

ബാക്കിയാകുന്ന ഏലക്കായകളിൽ വ്രണങ്ങൾ പോലെയുള്ള വളർച്ചകൾ (warty growth) ഉണ്ടാകുന്നു

കീടാക്രമണം ഏറ്റ ഏലക്കായകൾക്ക് തൂക്കവും ഗുണനിലവാരവും വളരെ കുറവായിരിക്കും. അതുകൊണ്ടുതന്നെ വിപണിയിൽ ഇതിന് വളരെ കുറഞ്ഞ വില മാത്രമേ ലഭിക്കുകയുള്ളൂ

ഏത് സമയത്താണ് ശ്രദ്ധിക്കേണ്ടത്?

ഡിസംബർ മുതൽ മെയ് വരെയുള്ള വരണ്ട മാസങ്ങളിലാണ് (dry months) ഈ കീടങ്ങളുടെ ആക്രമണം ഏറ്റവും കൂടുതലായി കാണപ്പെടുന്നത്. അതുകൊണ്ട് ഈ സമയങ്ങളിൽ കൃത്യമായി കീടനാശിനി പ്രയോഗിക്കേണ്ടത് അത്യാവശ്യമാണ്

മരുന്ന് തളിക്കേണ്ട സമയക്രമം:
ഡിസംബർ മുതൽ മെയ് വരെയുള്ള സമയത്ത് 4 തവണ കീടനാശിനി തളിക്കാൻ കാർഷിക സർവകലാശാല നിർദ്ദേശിക്കുന്നു.
മഴക്കാലമായ ജൂൺ, ജൂലൈ മാസങ്ങളിൽ കീടനാശിനി പ്രയോഗം ഒഴിവാക്കാവുന്നതാണ്.
തുടർന്ന് ഓഗസ്റ്റ് മുതൽ നവംബർ വരെയുള്ള സമയത്ത് 3 തവണ കൂടി മരുന്ന് തളിക്കണം
ഉപയോഗിക്കേണ്ട മരുന്നുകൾ:
ക്വിനാൽഫോസ് (Quinalphos) 0.05%
ഫോസലോൺ (Phosalone) 0.07%
ഡൈമെത്തോയേറ്റ് (Dimethoate) 0.05%
(ഇവയിൽ ഏതെങ്കിലും ഒരു കീടനാശിനിയാണ് ത്രിപ്സിനെ നിയന്ത്രിക്കാൻ ഉപയോഗിക്കേണ്ടത്).