കേരളത്തിൽ തുലാവർഷം നവംബർ ആദ്യവാരം മുതൽ സജീവമാകാൻ സാധ്യത

കേരളം ഉൾപ്പെടെയുള്ള തെക്ക്-പടിഞ്ഞാറൻ സംസ്ഥാനങ്ങളിൽ കഴിഞ്ഞ ഏതാനും ദിവസങ്ങളായി മഴ മാറിനിൽക്കുന്ന തെളിഞ്ഞ കാലാവസ്ഥയാണ് അനുഭവപ്പെടുന്നത്. മേഖലയിൽ നിലനിന്നിരുന്ന ഈർപ്പമുള്ള മഴമേഘങ്ങൾ ബംഗാൾ ഉൾക്കടലിലേക്ക് നീങ്ങുകയും, കരകയറിയ അർണാബ് ചുഴലിക്കാറ്റ് അതിവേഗം ദുർബലപ്പെടുകയും ചെയ്തതാണ് നിലവിലെ ശാന്തമായ അന്തരീക്ഷത്തിന് കാരണം. സ്വാഭാവികമായ കിഴക്കൻ കാറ്റിന്റെ സാന്നിധ്യം ദുർബലമായി തുടരുന്നതിനാൽ ഒക്ടോബർ 31 വരെ സംസ്ഥാനത്ത് മഴയില്ലാത്ത കാലാവസ്ഥ തുടരും. പകൽ സമയങ്ങളിൽ ചൂട് വർധിക്കുമെങ്കിലും രാത്രിയിലും പുലർച്ചെയും തണുപ്പും മഞ്ഞും അനുഭവപ്പെടാൻ സാധ്യതയുണ്ട്.

എന്നാൽ വരും ദിവസങ്ങളിൽ സംസ്ഥാനത്ത് തുലാവർഷം വീണ്ടും ശക്തി പ്രാപിക്കുമെന്നാണ് കാലാവസ്ഥാ പ്രവചനം. നിലവിൽ അന്തമാൻ കടലിൽ രൂപപ്പെട്ടിട്ടുള്ള ന്യൂനമർദ്ദം നവംബർ ആദ്യവാരത്തോടെ അതിശക്തമായ ന്യൂനമർദ്ദമായോ ചുഴലിക്കാറ്റായോ മാറി ആന്ധ്രാ-വടക്കൻ തമിഴ്നാട് തീരത്തേക്ക് നീങ്ങാൻ സാധ്യതയുണ്ട്. ഇതിന്റെ സ്വാധീനത്താൽ നവംബർ 1 മുതൽ കേരളത്തിലെ അന്തരീക്ഷത്തിൽ മാറ്റങ്ങൾ പ്രകടമാകും. ആദ്യദിനം പത്തനംതിട്ട, കോട്ടയം, ഇടുക്കി ജില്ലകളുടെ കിഴക്കൻ മേഖലകളിലും ഏതാനും പടിഞ്ഞാറൻ പ്രദേശങ്ങളിലും ഇടിമിന്നലോട് കൂടിയ ഇടത്തരം മഴ ലഭിച്ചേക്കും.

നവംബർ 2, 3 തീയതികളിൽ കേരളത്തിലെ കിഴക്കൻ മലയോര മേഖലകളിൽ ഒതുങ്ങി നിൽക്കുന്ന മഴ, അയൽ സംസ്ഥാനങ്ങളായ തമിഴ്നാട്ടിലും കർണാടകത്തിലും അതിശക്തമായി പെയ്യാൻ സാധ്യതയുണ്ട്. അതിനാൽ ഈ ദിവസങ്ങളിൽ അയൽ സംസ്ഥാനങ്ങളിലേക്ക് യാത്ര ചെയ്യുന്നവർ ജാഗ്രത പാലിക്കേണ്ടതാണ്. നവംബർ 4 മുതൽ പാലക്കാട്, മലപ്പുറം, കാസർഗോഡ് അടക്കമുള്ള വടക്കൻ ജില്ലകളുടെ കിഴക്കൻ മേഖലകളിലേക്ക് മഴ വ്യാപിച്ച് തുടങ്ങും.

നവംബർ 5 മുതൽ മധ്യ-വടക്കൻ കേരളത്തിൽ മഴയുടെ വ്യാപ്തി വർധിക്കുകയും നവംബർ 7, 8 തീയതികളോടെ തെക്കൻ കേരളം ഉൾപ്പെടെ സംസ്ഥാനത്തിന്റെ ഭൂരിഭാഗം പ്രദേശങ്ങളിലും ഇടിമിന്നലോടും ശക്തമായ കാറ്റോടും കൂടിയ മഴ കനക്കുകയും ചെയ്യും. പ്രധാനമായും ഉച്ചയ്ക്ക് ശേഷവും രാത്രിയിലുമായിരിക്കും മഴ ശക്തമാകുക. വരും ദിവസങ്ങളിൽ വെതർ സിസ്റ്റത്തിന്റെ സഞ്ചാരപാതയിൽ ഉണ്ടാകുന്ന മാറ്റങ്ങൾക്കനുസരിച്ച് മഴ മുന്നറിയിപ്പുകളിൽ മാറ്റങ്ങൾ വന്നേക്കാം.