കാലാവസ്ഥാ വ്യതിയാനം വീണ്ടും തീവ്രമാകുന്നു: അതിസമ്പന്നരുടെ പ്രകൃതി ചൂഷണം ദരിദ്ര രാജ്യങ്ങളെ തകർച്ചയിലേക്ക് തള്ളിയിടുന്നതായി ഓക്സ്ഫാം റിപ്പോർട്

ലോകമെമ്പാടും കാലാവസ്ഥാ വ്യതിയാനവും അത് മൂലമുണ്ടാകുന്ന പ്രകൃതിദുരന്തങ്ങളും രൂക്ഷമായിക്കൊണ്ടിരിക്കെ, ആഗോളതലത്തിൽ വർധിച്ചുവരുന്ന സാമ്പത്തിക അസമത്വവും അതിസമ്പന്നരുടെ കാർബൺ മലിനീകരണവുമാണ് ഈ പ്രതിസന്ധിക്ക് പ്രധാന കാരണമെന്ന് വ്യക്തമാക്കുന്ന ഓക്സ്ഫാം റിപ്പോർട്ട് പുറത്തുവന്നു. 'ഡിസാസ്റ്റർ ഡിവൈഡ്: ഹൗ ക്ലൈമറ്റ് കെയോസ് ഡീപ്പൻസ് ഇനെക്വാലിറ്റി ആൻഡ് എൻറിചെസ് ദി ഫ്യൂ' (Disaster Divide) എന്ന തലക്കെട്ടിൽ പുറത്തിറക്കിയ പഠന റിപ്പോർട്ടിലാണ് ഞെട്ടിപ്പിക്കുന്ന വിവരങ്ങൾ

വെളിപ്പെടുത്തിയിരിക്കുന്നത്.ആഗോള കാർബൺ മലിനീകരണത്തിന്റെ പകുതിയിലധികത്തിനും കാരണക്കാരായ അതിസമ്പന്നരും വൻകിട കോർപ്പറേറ്റുകളും തങ്ങളുടെ ആഡംബര ജീവിതത്തിലൂടെയും നിയന്ത്രണമില്ലാത്ത ബിസിനസ്സ് രീതികളിലൂടെയും ഭൂമിയുടെ താപനില കുതിച്ചുയർത്തുകയാണ്. വൻതോതിലുള്ള കാർബൺ പുറന്തള്ളൽ മൂലം വരും വർഷങ്ങളിൽ ലോകമെമ്പാടും കഠിനമായ ഉഷ്ണതരംഗങ്ങളും പ്രകൃതിദുരന്തങ്ങളും മൂലം ദശലക്ഷക്കണക്കിന് ആളുകൾക്ക് ജീവൻ നഷ്ടപ്പെടാൻ സാധ്യതയുണ്ടെന്ന് ഓക്സ്ഫാം മുന്നറിയിപ്പ് നൽകുന്നു. എന്നാൽ പ്രകൃതിയെ ഏറ്റവും കുറഞ്ഞ രീതിയിൽ മാത്രം മലിനമാക്കുന്ന പാവപ്പെട്ട ജനവിഭാഗങ്ങളും വികസിച്ചു കൊണ്ടിരിക്കുന്ന രാജ്യങ്ങളുമാണ് ഈ കാലാവസ്ഥാ വ്യതിയാനത്തിന്റെ ദുരന്തഫലങ്ങൾ ഏറ്റവുമധികം അനുഭവിക്കുന്നത്.

തീവ്രമായ എൽ നിനോ പ്രതിഭാസവും ആഗോളതാപനവും ചേർന്ന് ഭക്ഷ്യസുരക്ഷയെയും കാർഷിക മേഖലയെയും അതിരൂക്ഷമായി ബാധിക്കുകയാണ്. ആവർത്തിച്ചുള്ള വെള്ളപ്പൊക്കം, വരൾച്ച, ചുഴലിക്കാറ്റുകൾ എന്നിവ മൂലം പാവപ്പെട്ട ജനവിഭാഗങ്ങളുടെ വീടുകളും ജീവനോപാധികളും തകരുകയും ആഗോളതലത്തിൽ പട്ടിണിയും പോഷകാഹാരക്കുറവും വർധിക്കുകയും ചെയ്യുന്നു. അതിരൂക്ഷമായ സാമ്പത്തിക അസമത്വമുള്ള രാജ്യങ്ങളിൽ ഇത്തരം കാലാവസ്ഥാ ദുരന്തങ്ങൾ മൂലമുണ്ടാകുന്ന മരണനിരക്ക് ഉയർന്ന തോതിലാണെന്ന് റിപ്പോർട്ട് ചൂണ്ടിക്കാണിക്കുന്നു. അതിസമ്പന്നർ ഉണ്ടാക്കുന്ന പരിസ്ഥിതി നാശത്തിന്റെ നഷ്ടം സാധാരണക്കാർ അനുഭവിക്കുമ്പോൾ, ദുരന്ത നിവാരണ പ്രവർത്തനങ്ങളിൽ നിന്നും വിപണിയിലെ വിലക്കയറ്റത്തിൽ നിന്നും കോർപ്പറേറ്റുകൾ വൻലാഭം കൊയ്യുന്ന പ്രവണതയും ശക്തമാകുന്നുണ്ട്. വരാനിരിക്കുന്ന വലിയ കാലാവസ്ഥാ ദുരന്തങ്ങളെ പ്രതിരോധിക്കാൻ സമ്പന്ന രാജ്യങ്ങളും വൻകിട കമ്പനികളും കൂടുതൽ സാമ്പത്തിക ഉത്തരവാദിത്തം ഏറ്റെടുക്കണമെന്നും, കാർബൺ പുറന്തള്ളലിന് കടുത്ത നികുതി ചുമത്തണമെന്നും, കാലാവസ്ഥാ വ്യതിയാനത്തെ പ്രതിരോധിക്കാനുള്ള അടിയന്തര നടപടികൾ സ്വീകരിക്കണമെന്നും ഓക്സ്ഫാം ആവശ്യപ്പെടുന്നു.