ജൈവമാലിന്യത്തിൽ നിന്ന് സ്വർണ്ണം വിളയിക്കാം; ബി.എസ്.എഫ് ലാർവ കൃഷിയിലൂടെ തീറ്റച്ചെലവ് പകുതിയാക്കാം, ഒപ്പം മികച്ച വരുമാനവും!

കോഴി, മത്സ്യം, താറാവ്, പന്നി തുടങ്ങിയവയെ വളർത്തുന്ന കർഷകർ നേരിടുന്ന പ്രധാന വെല്ലുവിളിയായ ഉയർന്ന തീറ്റച്ചെലവിന് പരിഹാരവുമായി ബ്ലാക്ക് സോൾജ്യർ ഫ്ലൈ (ബി.എസ്.എഫ്) ലാർവ കൃഷി ജനശ്രദ്ധ നേടുന്നു. അടുക്കളയിലെയും ഫാമുകളിലെയും ജൈവമാലിന്യങ്ങൾ മാത്രം തീറ്റയായി നൽകി വളരെ എളുപ്പത്തിൽ വളർത്തിയെടുക്കാവുന്ന ഈ ലാർവകൾ മാലിന്യസംസ്കരണത്തിലും മൃഗസംരക്ഷണ മേഖലയിലും വൻ വിപ്ലവമാണ് സൃഷ്ടിക്കുന്നത്.

ബ്ലാക്ക് സോൾജ്യർ ഫ്ലൈ എന്ന കറുത്ത ഈച്ചയുടെ പുഴുക്കളാണ് ബി.എസ്.എഫ് ലാർവകൾ. കടന്നലിനോട് സാദൃശ്യമുള്ള ഈ ഈച്ചകൾ മനുഷ്യർക്കോ മൃഗങ്ങൾക്കോ യാതൊരുവിധ ദോഷവും വരുത്തുന്നില്ല. ഭക്ഷണാവയവങ്ങളില്ലാത്തതിനാൽ വെള്ളം മാത്രം കുടിച്ച് ഏതാനും ദിവസങ്ങൾ കൊണ്ട് ഇവ മുട്ടയിട്ട് ചത്തൊടുങ്ങുന്നു. വീടുകളിൽ കയറാത്ത ഇവ അസുഖങ്ങൾ പരത്തുന്നുമില്ല.

പോഷകങ്ങളുടെ കാര്യത്തിൽ മുൻപന്തിയിൽ നിൽക്കുന്ന ഈ ലാർവകളിൽ 40 മുതൽ 45 ശതമാനം വരെ ക്രൂഡ് പ്രോട്ടീനും 30 മുതൽ 35 ശതമാനം വരെ കൊഴുപ്പും കാൽസ്യവും അടങ്ങിയിരിക്കുന്നു. പച്ചക്കറി അവശിഷ്ടങ്ങൾ, ചീഞ്ഞ പഴങ്ങൾ, ഭക്ഷണാവശിഷ്ടങ്ങൾ, അറവുമാലിന്യം, ചാണകം തുടങ്ങി ഏത് ജൈവമാലിന്യവും ഇവ വേഗത്തിൽ തിന്നുതീർക്കും. ലാർവകൾ മാലിന്യം തിന്ന് പുറന്തള്ളുന്ന വിസർജ്യം എൻ.പി.കെ ഘടകങ്ങൾ അടങ്ങിയ ഉയർന്ന ഗുണനിലവാരമുള്ള ജൈവവളമായി (Frass) ഉപയോഗിക്കാനും സാധിക്കും.

മുട്ടക്കോഴികൾക്ക് ഇത് തീറ്റയായി നൽകുന്നതിലൂടെ മുട്ടയുത്പാദനവും മുട്ടത്തോടിന്റെ കട്ടിയും വർദ്ധിക്കും. ഇറച്ചിക്കോഴികൾക്ക് വേഗത്തിൽ തൂക്കം ലഭിക്കാനും ഇത് സഹായിക്കുന്നു. തിലാപ്പിയ, വാള, അലങ്കാര മത്സ്യങ്ങൾ എന്നിവയ്ക്ക് മികച്ച ലൈവ് ഫീഡായും അലങ്കാരപ്പക്ഷികൾക്കും മറ്റ് വളർത്തുമൃഗങ്ങൾക്കും ഉണങ്ങിയ ലാർവകളായും ഇത് നൽകാവുന്നതാണ്.

വീടുകളിൽ വളരെ ലളിതമായി ബി.എസ്.എഫ് വളർത്തൽ നടത്താം. കൊതുക് വല ഉപയോഗിച്ച് നിർമ്മിക്കുന്ന 'ലവ് കേജിൽ' പ്യൂപ്പകളെ ഇട്ടുകൊടുത്താൽ ഈച്ചകളായി മാറി ഇണചേരും. അതിനുശേഷം മുട്ടയിടാനായി മരക്കഷ്ണങ്ങളോ കാർഡ്ബോർഡോ വച്ചുകൊടുക്കാം. വിരിയുന്ന ചെറിയ പുഴുക്കളെ തീറ്റ ട്രേകളിലേക്ക് മാറ്റി അടുക്കള അവശിഷ്ടങ്ങൾ നൽകി വളർത്താം. 14 മുതൽ 18 ദിവസത്തിനുള്ളിൽ പൂർണ്ണവളർച്ചയെത്തുന്ന ലാർവകളെ ജീവനോടെയോ ഉണക്കിയോ തീറ്റയായി ഉപയോഗിക്കാം.

സ്വന്തം ഫാമിലെ തീറ്റച്ചെലവ് പകുതിയായി കുറയ്ക്കുന്നതോടൊപ്പം മികച്ച വരുമാനസാധ്യതയും ഇത് വാഗ്ദാനം ചെയ്യുന്നു. ജീവനുള്ള ലാർവകൾക്ക് കിലോഗ്രാമിന് 80 മുതൽ 150 രൂപ വരെയും ഉണക്കിയ ലാർവകൾക്ക് കിലോയ്ക്ക് 800 മുതൽ 1,500 രൂപ വരെയും വിപണിയിൽ വില ലഭിക്കുന്നുണ്ട്. കൂടാതെ, ബി.എസ്.എഫ് മുട്ടകൾ ഗ്രാമിന് 50 മുതൽ 100 രൂപ നിരക്കിലും, ലാർവകളുടെ വിസർജ്യമായ ഫ്രാസ് കിലോയ്ക്ക് 20 മുതൽ 35 രൂപ നിരക്കിലും വിറ്റ് മികച്ച ലാഭം കൊയ്യാവുന്നതാണ്.