ബംഗാൾ ഉൾക്കടലിലെ ചുഴലിക്കാറ്റ്: സംസ്ഥാനത്ത് വരുംദിവസങ്ങളിൽ തുലാവർഷം വീണ്ടും സജീവമാകും

ബംഗാൾ ഉൾക്കടലിൽ കഴിഞ്ഞ ആഴ്ച രൂപപ്പെട്ട ചുഴലിക്കാറ്റിനെത്തുടർന്ന് കേരളം, തമിഴ്‌നാട്, കർണാടക മേഖലകളിലെ അന്തരീക്ഷ ഈർപ്പം വൻതോതിൽ വലിച്ചെടുക്കപ്പെട്ടതോടെയാണ് കഴിഞ്ഞ ഏതാനും ദിവസങ്ങളായി സംസ്ഥാനത്ത് മഴ ദുർബലമായത്. ഈർപ്പം കുറഞ്ഞ അന്തരീക്ഷസ്ഥിതിയും അന്തരീക്ഷത്തിൽ ഏഴ് കിലോമീറ്ററിന് മുകളിലായി ഉത്തരേന്ത്യയിൽ നിന്ന് ദക്ഷിണേന്ത്യയിലേക്ക് വ്യാപിച്ച ജെറ്റ് സ്ട്രീമിന്റെ സ്വാധീനവും കാരണം കഴിഞ്ഞ ദിവസങ്ങളിൽ രാത്രികാലങ്ങളിൽ താപനില കുറയുകയും തണുപ്പ് അനുഭവപ്പെടുകയും ചെയ്തിരുന്നു. എന്നാൽ ഇത് താൽക്കാലിക പ്രതിഭാസം മാത്രമാണ്.

ഇന്ന് വൈകുന്നേരത്തോടെയോ രാത്രിയോടെയോ സംസ്ഥാനത്തെ എല്ലാ ജില്ലകളിലും അങ്ങിങ്ങായി മഴ ലഭിക്കാൻ സാധ്യതയുണ്ട്. മധ്യ-തെക്കൻ ജില്ലകളിലാണ് കൂടുതൽ മഴയ്ക്ക് സാധ്യതയുള്ളത്. പ്രത്യേകിച്ച് കോട്ടയം, ആലപ്പുഴ, എറണാകുളം, പത്തനംതിട്ട ജില്ലകളിൽ ഒറ്റപ്പെട്ട ശക്തമായ മഴ ലഭിച്ചേക്കും. അടുത്ത മൂന്ന് ദിവസങ്ങളിൽ വടക്കൻ ജില്ലകളിലും മധ്യ-തെക്കൻ ജില്ലകളുടെ കിഴക്കൻ മലയോര മേഖലകളിലും ഇടിയോടു കൂടിയ മഴ തുടരും.

അതേസമയം, ബംഗാൾ ഉൾക്കടലിൽ ഇന്ന് രാത്രിയോടെ മറ്റൊരു ചുഴലിക്കാറ്റ് കൂടി രൂപപ്പെടാൻ സാധ്യതയുണ്ട്. ഇതിന് കേരളത്തിൽ നേരിട്ട് സ്വാധീനമുണ്ടാകില്ല. ചൊവ്വാഴ്ചയോടെ ആന്ധ്രാപ്രദേശ് തീരത്ത് കരകയറുന്ന ഈ ചുഴലിക്കാറ്റ് അടുത്ത 48 മണിക്കൂറിനുള്ളിൽ ദുർബലമാകുന്നതോടെ കേരളത്തിൽ തുലാവർഷം കൂടുതൽ ശക്തി പ്രാപിക്കും. നവംബർ നാലിന് ശേഷം വരുന്ന ബുധനാഴ്ച മുതൽ സംസ്ഥാനത്തെ എല്ലാ ജില്ലകളിലും മഴ പരക്കെ സജീവമാകുമെന്നാണ് പ്രതീക്ഷിക്കുന്നത്.