കാർഷിക മേഖലയിലെ നിയന്ത്രണങ്ങൾ ലളിതമാക്കാൻ കേന്ദ്ര സർക്കാർ; വിത്തു-വള നിർമ്മാണ കമ്പനികളുമായി ചർച്ച ആരംഭിച്ചു

രാജ്യത്തെ കാർഷിക മേഖലയിലെ ബിസിനസ് നടപടികൾ കൂടുതൽ എളുപ്പമാക്കുന്നതിനും നിയമപരമായ തടസ്സങ്ങൾ നീക്കുന്നതിനുമായി വിത്ത്, വള നിർമ്മാണ കമ്പനികളുമായും കയറ്റുമതിക്കാരുമായും കേന്ദ്ര സർക്കാർ ചർച്ചകൾ ആരംഭിച്ചു. കാലഹരണപ്പെട്ട നിയമങ്ങൾ പരിഷ്കരിക്കാനും ഉൽപ്പന്നങ്ങൾക്കുള്ള അനുമതി നടപടികൾ വേഗത്തിലാക്കാനും ആഭ്യന്തര-ആഗോള വിപണികളിൽ ഇന്ത്യൻ കാർഷിക കമ്പനികളുടെ മത്സരക്ഷമത വർദ്ധിപ്പിക്കാനുമാണ് കേന്ദ്ര നീക്കം. ഇതിന്റെ ഭാഗമായി നീതി ആയോഗ് പ്രതിനിധികൾ ഉദ്യോഗസ്ഥരുമായി ആദ്യഘട്ട കൂടിക്കാഴ്ച നടത്തി.

നിലവിലെ പല സാങ്കേതിക മുന്നേറ്റങ്ങൾക്കും 1966-ലെ വിത്ത് നിയമം പര്യാപ്തമല്ലെന്ന് കമ്പനികൾ ചൂണ്ടിക്കാട്ടുന്നു. വിവിധ സംസ്ഥാനങ്ങളിൽ വ്യത്യസ്ത തരത്തിലുള്ള ട്രയലുകളും പരിശോധനകളുമാണ് നടക്കുന്നത്. ഇത് പുതിയ ഇനം വിത്തുകൾ വിപണിയിലിറക്കുന്നതിൽ വലിയ കാലതാമസമുണ്ടാക്കുന്നു. അനുമതി നടപടികൾ ഏകീകൃതവും വേഗത്തിലുമാക്കിയാൽ കാലാവസ്ഥാ വ്യതിയാനങ്ങളെ പ്രതിരോധിക്കാൻ ശേഷിയുള്ള പുതിയ വിത്തിനങ്ങൾ കർഷകരിലേക്ക് വേഗത്തിൽ എത്തിക്കാൻ സാധിക്കും.

സമാനമായ രീതിയിൽ പുതിയ ഉൽപ്പന്നങ്ങൾക്കുള്ള ക്ലിയറൻസ് വേഗത്തിലാക്കാനും ലൈസൻസിംഗ് നടപടികൾ ലളിതമാക്കാനും വള നിർമ്മാണ മേഖലയും ആവശ്യപ്പെട്ടിട്ടുണ്ട്. വിപണിയിലെ ഡിമാൻഡിനനുസരിച്ച് പുതിയ കാർഷിക ഉൽപ്പന്നങ്ങൾ വേഗത്തിൽ വിപണിയിലെത്തിക്കാൻ ഈ മാറ്റങ്ങൾ സഹായിക്കുമെന്നാണ് പ്രതീക്ഷിക്കുന്നത്. ഇതിനുപുറമേ, അന്താരാഷ്ട്ര തലത്തിൽ കാർഷിക കയറ്റുമതി വർദ്ധിപ്പിക്കുന്നതിനായി കയറ്റുമതി നടപടിക്രമങ്ങൾ കൂടുതൽ സുതാര്യവും എളുപ്പവുമാക്കുന്ന കാര്യങ്ങളും സർക്കാരിന്റെ പരിഗണനയിലുണ്ട്.