കുരുമുളകിന് റെക്കോർഡ് വില; രാജ്യാന്തര വിപണിയിൽ മുന്നേറ്റവുമായി റബർ, കാപ്പിയിൽ ആഗോള ഇടിവ്

അന്തർസംസ്ഥാന വ്യാപാരികളിൽ നിന്നുള്ള ശക്തമായ വാങ്ങൽ താല്പര്യം മുൻനിർത്തി സംസ്ഥാനത്ത് കുരുമുളക് വില വീണ്ടും വർധിച്ച് റെക്കോർഡ് നിരക്കിലെത്തി. ക്വിന്റലിന് 200 രൂപയുടെ വർധനവാണ് രേഖപ്പെടുത്തിയത്. നിലവിൽ അൺഗാർബിൾഡ് കുരുമുളകിന് 74,600 രൂപയും, ഗാർബിൽഡിന് 76,600 രൂപയും, പുതിയ കുരുമുളകിന് 73,600 രൂപയുമാണ് വിപണിയിലെ നിരക്ക്.

രാജ്യാന്തര റബർ വിപണിയിൽ ജപ്പാൻ യെന്നിന്റെ വിനിമയ മൂല്യം ദുർബലമായത് വിദേശ നിക്ഷേപകരെ ആകർഷിച്ചതോടെ ഒസാക്കയിൽ റബർ കിലോയ്ക്ക് 440 യെൻ വരെ ഉയർന്നു. ബാങ്കോക്കിൽ റബർ കിലോയ്ക്ക് 257 രൂപ നിലവാരത്തിലാണ് വ്യാപാരം നടക്കുന്നത്. ആഭ്യന്തര വിപണിയിൽ കൊച്ചിയിൽ നാലാം ഗ്രേഡ് റബറിന് കിലോയ്ക്ക് 290 രൂപയിൽ വ്യാപാരം തുടരുന്നു. റബർ വിലയിലെ ഈ മുന്നേറ്റം തോട്ടം മേഖലയിലെ ടാപ്പിങ് പുനരാരംഭിക്കാൻ കർഷകർക്ക് കൂടുതൽ ആവേശം പകർന്നിട്ടുണ്ട്

അതേസമയം ഡോളറിനെതിരെ ബ്രസീലിയൻ നാണയമായ റിയലിന്റെ മൂല്യം 15 മാസത്തിനിടയിലെ ഏറ്റവും താഴ്ന്ന നിലവാരത്തിലേക്ക് ഇടിഞ്ഞത് ആഗോള കാപ്പി വിപണിയെ തണുപ്പിച്ചു. അറബിക്ക കാപ്പി വില ഏഴാഴ്ചയിലെ താഴ്ന്ന നിലവാരത്തിലാണ് എത്തിനിൽക്കുന്നത്. എന്നാൽ ദക്ഷിണേന്ത്യയിൽ മൺസൂണിലെ കുറവ് ഉൽപ്പാദനത്തെ ബാധിച്ചേക്കുമെന്ന ആശങ്ക നിലനിൽക്കുന്നുണ്ട്. നിലവിൽ കൽപ്പറ്റ വിപണിയിൽ കാപ്പി ക്വിന്റലിന് 37,000 രൂപ നിരക്കിലാണ് വ്യാപാരം പൂർത്തിയാക്കിയത്.